The Definitive Guide to Living in the Capital , Cairo , Egypt

خبر جميل نشرته محافظة القاهرة النهارده، وهيهم كل اللي بيحبوا هواية ركوب الدراجات الهوائية أو العجل، أو حتى اللي بياخدوها كرياضة أو وسيلة مواصلات، وهو بدأ العمل في مواقع المشروع التجريبى لمسار وأماكن ركن الدراجات الهوائية بطول 2 كيلومتر فى وسط البلد تحت عنوان “سكتك خضرا” واللي هيكون عبارة عن حارة مرورية بعرض متر و70 سنتيمتر محددة بأقماع وسلاسل حديدية للأمان.

مشروع “سكتك خضرا” بدأ فعليًا في ميدان عابدين وميدان طلعت حرب، وشارع محمد فريد، وهيكون بالتنسيق مع المرور وجهاز هندسة تخطيط المرور، ويعتبر خطوة حقيقية للقضاء على معاناة طويلة لأصحاب الدراجات الهوائية في وجود طريق يمشوا فيه في وسط شوارع العاصمة، أو حتى أماكن يركنوا فيها عجلهم لو اضطروا يوقفوا لأي طارئ، وهيحمي من السرقة والعشوائية في الركن كمان.

هيتم خلال التجربة دي قياس مدى تأثيرها على الحركة المرورية في وسط القاهرة، وفي حال نجحت وكان تأثيرها إيجابي هيتم تنفذ المرحلة الثانية من المشروع خلال بداية السنة الجاية، بس المرة دي هتبقى على مسافة 15 كيلومتر، يعني هتغطي معظم مناطق القاهرة، وبالأخص مناطق مصر الجديدة وعابدين والأزبكية وحي غرب.

مفيش شك إن الاهتمام بمشاريع خاصة بالنوع ده من الرياضات أو الهوايات زي إنشاء حارات خاصة فى الشوارع هيساعد كتير في تنمية الوعي ونشر ثقافة الاعتماد على الدراجات كوسيلة نقل ومواصلات، وهيساعد كمان في الحد من ظاهرة التلوث البيئى والبصري والسمعي والإزعاج، وكمان هيساهم بشكل كبير في تقليل الكثافات المرورية.

لو حابين تعرفوا أكتر عن مشروع “سكتك خضرا” ممكن تتابعوهم على صفحتهم الرسمية على الفيسبوك من هنا.