The Definitive Guide to Living in the Capital , Cairo , Egypt

لو أنت من محبي الجيمينج والرياضات الإلكترونية، جهز نفسك علشان تعيش تجربة استثنائية السنة دي مع عودة Esports Summit 2025 في القاهرة!

الحدث راجع في نسخته الجديدة يوم 9 و10 أكتوبر في صالة حسن مصطفى بمدينة 6 أكتوبر، بمشاركة آلاف اللاعبين والمشاهدين، وبالتعاون مع الاتحاد المصري لكرة القدم، الاتحاد المصري للرياضات الإلكترونية، سامسونج اليكترونيكس مصر، ريد بُل، ومنصة Watch It.

الـ Esports Summit بقى أكبر وأهم حدث للألعاب في مصر والشرق الأوسط، بيجمع كل حاجة في مكان واحد؛ لاعبين محترفين، منصات بث، شركات تقنية، وكمان بطولات عالمية.

الجديد في نسخة 2025:

شراكة قوية مع الاتحاد المصري لكرة القدم، ومنصة Watch It اللي هتبث المباريات لايف.

سامسونج اليكترونيكس مصر راجعالنا كراعي رئيسي وكشريك حصري للموبايلات، وده ضمن شراكتها اللي بقالها أكتر من 10 سنين مع شركة FWZ.

لأول مرة في مصر، هتتعمل البطولة الرسمية للعبة FC بالتعاون مع شركة EA.

وكمان الحدث هيتستضيف تصفيات بطولة Red Bull Home Ground العالمية، واللي الفائزين منها هيسافروا يمثلوا مصر في النهائيات بنيويورك!

التوقعات السنة دي كبيرة جدًا؛ أكتر من 10,000 زائر هيحضروا الفعالية، و20 مليون متابع أونلاين، و5 مليون مشاهدة للمحتوى. الأرقام دي بتأكد إن Esports Summit بقى واحد من أضخم وأهم الفعاليات في عالم الألعاب بالمنطقة.

أحمد عبد اللطيف، الرئيس التنفيذي لشركة FWZ، قال إن الشراكات الكبيرة دي مع علامات زي سامسونج وريد بُل واتحاد الكرة بتأكد الثقة في قوة الحدث، وإن مصر دلوقتي بقت منافس حقيقي في تنظيم فعاليات عالمية في مجال الرياضات الإلكترونية.

ومن الأرقام اللي حققتها النسخ اللي فاتت؛ أكتر من 59 مليون وصول على المنصات، و10 مليون مشاهدة فيديوهات، وحضور فعلي لـ 15,000 زائر. وده بيدل قد إيه مجتمع الرياضات الإلكترونية في مصر والمنطقة مستني الفعالية دي كل سنة بشغف.