The Definitive Guide to Living in the Capital , Cairo , Egypt

الصورة الرئيسية: Marcus Hjelm on Unsplash 

بعد شهور طويلة من الحر والشمس اللي ما كانتش بترحم، الخريف أخيرًا رجع يزور القاهرة. نسمة الهوا بقت ألطف، والشمس أهدى، والجو ابتدى ياخد شكله الجميل اللي بنستناه كل سنة.

هيئة الأرصاد الجوية أعلنت إن القاهرة والوجه البحري والسواحل الشمالية وجنوب سيناء هتعيش أجواء خريفية بامتياز، والمساء هيكون معتدل ومريح على أغلب الأنحاء.

الدكتورة منار غانم، عضو المركز الإعلامي بهيئة الأرصاد، قالت لـكايرو360 إن الكتل الهوائية اللي جاية من شرق البحر المتوسط هي السبب في الجو الحلو ده، والنتيجة إن درجات الحرارة بدأت تنزل تدريجيًا وبقت ما بين 30 و31 درجة في القاهرة الكبرى، وبتوصل لحد 36 في محافظات الصعيد.

وأضافت كمان إن فيه نشاط رياح على فترات متقطعة، بيدي إحساس لطيف بالهواء المنعش، لكنه في نفس الوقت ممكن يعمل اضطراب بسيط في حركة الملاحة على البحر المتوسط، خصوصًا قبالة سواحل العلمين ومطروح والإسكندرية، وارتفاع الموج ممكن يوصل لـ3 أمتار.

كمان فيه احتمال بسيط لسقوط أمطار خفيفة لمتوسطة على السواحل الشمالية الغربية وشمال الوجه البحري، ومع الأيام الجاية متوقع إن درجات الحرارة تكمّل نزولها تدريجيًا.

نصيحة من الأرصاد

بتنصحكم “غانم” تلبسوا لبس خريفي في الساعات المتأخرة من الليل وفي الصبح بدري، علشان الجو هيبقى فيه برودة لطيفة، ومهم كمان متابعة النشرات الجوية أول بأول لأي تغييرات مفاجئة.

الخريف رجع القاهرة.. ومعاه حالة من الهدوء والروقان اللي بنفتقدهم طول الصيف.