The Definitive Guide to Living in the Capital , Cairo , Egypt

مانقدرش ننكر إن “التوكتوك” أصبح واحد من أهم وسائل النقل في مصر بشكل عام، وفي القاهرة، خاصة في مناطقها الشعبية، بوجه خاص. ورغم إن حجم التوكتوك مناسب لشوارع المناطق الشعبية في القاهرة، إلا أنه سبب رئيسي في مشاكل كتير، خصوصًا وإن كتير من اللي بيسوقوه أطفال، وعلشان كده قررت الحكومة المصرية تنفيذ مشروع مهم لاستبدال التوكتوك بوسيلة نقل آمنة.. تعالوا نعرف التفاصيل من خلال 5 معلومات فيهم الخلاصة.

1 – مؤخرًا، أعلنت نيفين جامع، وزيرة الصناعة والتجارة، البدء في تنفيذ برنامج لإحلال التوك توك في القاهرة الكبرى كبداية، وهيكون سعر التوكتوك مقدم للتخريد (يعني تحويل التوكتوك لخردة)، وهيتم سداد باقي سعر سيارة بتشتغل بالغاز الطبيعي على فترة سداد ميسرة.

2 – ومن فترة، أصدرت وزارة التجارة والصناعة، القرار الوزاري رقم 533 لسنة 2021 والخاص بوقف استيراد المكونات الأساسية للتوكتوك، وهي القاعدة والشاسيه والمحرك، ومن وقتها والعمل جاري بالقرار ده.

3 – الهدف من مشروع إحلال التوكتوك هو تنفيذ خطة الدولة اللي بتهدف لتطوير منظومة وسائل النقل وإتاحة وسائل مواصلات آمنة للحفاظ على سلامة المواطنين.

4 – وبتقول الحكومة المصرية إن المشروع ده جاء بعد دراسة متأنية من كل الأجهزة المعنية، وبيستهدف إحلال التوك توك بوسيلة نقل آمنة، وده تنفيذًا للمبادرة الرئاسية الخاصة بإحلال المركبات للعمل بالطاقة النظيفة وبصفة خاصة الغاز الطبيعي.

5 – وبتستهدف الحكومة إتاحة سيارات ميني ڤان كبديل عن التوكتوك.