The Definitive Guide to Living in the Capital , Cairo , Egypt

بتشهد مصر في السنوات الأخيرة مشاريع ضخمة ومهمة، دي حقيقة ماحدش يقدر ينكرها، لكن بعض المشاريع دي بتسبب حالة جدل، زي مثلًا مشروع “كايرو آي” اللي أعلن سكان الزمالك عن تخوفهم من إنه هيغير طبيعة المنطقة، فقررت الحكومة وقفه مؤقتًا، وكمان مشروع تطوير القاهرة التاريخية اللي بعض المصريين تخوفوا من إنه ممكن يغير طبيعة المنطقة التاريخية، لكن الحكومة طمنتهم بأنها هتنفذه بدون تغيير طبيعة المباني اللي أغلبها بيعتبر تراث عالمي.

ومن المشاريع اللي متوقع نشوفها في مصر قريب، محور الجزائر، واللي أعلنت الحكومة إنه بيهدف لخدمة سكان المعادي والبساتين، لكن في المقابل بعض سكان المعادي طالبوا بوقفه من خلال عريضة على موقع “Change.org” لأنه من وجهة نظرهم هيغير الطابع المعماري لحي المعادي الجميل والهادئ.

في الموضوع ده هنعرفكم على الحكاية الكاملة للمشروع ده، وهنلقي الضوء كمان على أسباب تخوف بعض سكان المعادي من بدء العمل فيه وطالبتهم بوقفه.

محور الجزائر هو واحد من 3 محاور أعلنت الحكومة عن العمل عليهم حاليًا، بهدف ربطهم بالتجمعات العمرانية، والـ 3 محاور دول هم محور المريوطية اللي هيربط الطريق الدائري والدائري الأوسطي، والدائري الإقليمي، وهيخدم قرى محافظة الجيزة والصعيد، و المناطق السياحية بالهرم وسقارة.

والمحور الثاني هو محور المرج اللي هيخدم مناطق المرج والخصوص والخانكة وأبو زعبل.

والمحور الثالث هو الجزائر اللي هيخدم سكان المعادي والبساتين، وهيشمل تطوير منطقة الورش أسفل الطريق الدائري في بداية طريق السخنة، والمحور هيكون في شارع الجزائر وهيفصل حي البساتين الشرقي والغربي وصولًا للمعادي. 

والمحاور الـ 3 هيكونوا بطول 100 كيلومتر، وبتكلفة 3.5 مليار جنيه، وأعلنت الحكومة عن تعويض أصحاب الأراضي والعقارات اللى هيتم إزالتها لإقامة المحاور، ومن المتوقع يتم الانتهاء منهم نهاية السنة دي 2021.

تخوفات على الطابع المعماري للمعادي

بعض السكان المعادي أعلنوا بشكل متحضر عن تخوفهم من إنشاء محور الجزائر، وطالبوا الحكومة بوقفه، وعملوا من حوالي أسبوع عريضة على موقع Change.org قالوا فيها: “برجاء وقف خطة تنفيذ محور الجزائر والذي مخطط له أن يقطع المنطقة السكنية الهادئة بالمعادي و يمزقها إلى نصفين ويقطع أشجارها ونخيلها ويقلب حياة سكانها إلي جحيم وضوضاء وأخطار عديدة ويقضي على الطابع المعماري الجميل لحي المعادي”.

ولحد اللحظة دي وقع على العريضة أكتر من 2500 شخص من سكان المعادي.