The Definitive Guide to Living in the Capital , Cairo , Egypt

الحياة في كايرو

العمل من المنزل: إزاي تبقى رئيس جمهورية نفسك؟!

العمل من المنزل: إزاي تبقى رئيس جمهورية نفسك؟!
بواسطة
Mustafa Abd Rabu

يعني إيه Freelancer؟

زمان كانت الجيوش بتمشي مسافات طويلة جدًا، وبالتالي بيحصل فقد في القوات بسبب المعارك وسوء التغذية والعوامل الجوية زي البرد والحر. فكان القادة يجندوا عساكر محترفين من سكان البلاد اللي بيمروا عليها. ومع الوقت ظهر إن الجنود دول صحتهم أحسن لأنهم متعودين على الجو بتاع المنطقة، وعندهم دراية بطبيعة الأراضي حواليهم.

والترجمة الحرفية لكلمة Freelance الرمح الحرّ. وبعد كده تم استخدامها للموظفين اللي بيتعاملوا مع المؤسسة بالقطعة.

 

ليه أشتغل Freelance؟

السؤال ده ماحدش يقدر يجاوب عليه غير الفري لانسر نفسه. لكن نقدر نحدد إجابة السؤال في سببين.

أولًا: الحاجات المادية

وخاصة وسط الظروف الاقتصادية السيئة اللي بنعيشها في مصر وفي المنطقة العربية ككل.

ثانيًا: لإرضاء الشغف

يعني مثلًا لو أنت شغال في مكان دمه ثقيل ومش حابب تكون فيه، لكن الظروف اضطرتك له. وبتحب تعمل حاجة تانية، تصمم أغلفة أو بنرات مثلًا. فلازم ترضي شغفك، وتستثمر موهبتك وإمكانياتك.

وهنا إحنا هنساعدك علشان تقف على أول الطريق. لكن قبل أي حاجة لازم تشوف حاجة أنت بتقدر تعملها كويس. ولو مافيش اتعلم واستغل وقتك.

دور على مواقع الفري لانس

ثقافة الفري لانس انتشرت جدًا الفترة اللي فاتت. وبقى في مواقع عربية بتقدم خدمات العمل الحر. وتبقى وسيط بين الفري لانسر وبين العميل. ودي مجموعة مواقع تقدر تقدم نفسك من خلالها. لكن الأهم إنك تعمل صفحتك الشخصية ببيانات كلها صحيحة وبصورة شخصية. وطبعًا جوجل موجود تقدر تلاقي فيه مواقع كثيرة جدًا.

https://khamsat.com/

https://www.nabbesh.com/en/

https://ikhedmah.com/

https://mostaql.com/

http://www.guru.com/

https://www.peopleperhour.com/

https://www.freelancer.com

https://www.textbroker.com/

 

الجودة

إيه اللي يخلي العميل يختارك أنت، من وسط آلاف الفري لانسرز؟

علشان منتشر وعرفت تسوق نفسك كويس؟ ولا علشان بتقدم أسعار أرخص من باقي الناس؟

الإجابة هي: إن العميل هيحتارك علشان شغلك كويس ومتقن.

الانتشار مش دليل على النجاح أو جودة الإنتاج. والعملاء ممكن يدفعوا أكثر شوية علشان يضمنوا منتج كويس. وللأسف الاتقان أو الجودة مش منتشر أوي عندنا. لكن ده هيبقى سبب نجاحك لو عملت شغل متقن. وده مش هيحصل غير لما تحس إن الشغل الجيد بيرضيك أنت قبل العميل، مش مجرد أكل عيش وخلاص.

 

هاوي ولا محترف؟

من البداية لازم تعرف كويس إن العمل الحر ممكن يكون أصعب من الشغل الثابت. لأنك مسئول عن كل شيء، الربح ليك والخسارة ليك برضه. عليك كل تفاصيل الشغل. بداية من التسويق لحد الفينيش. وعلشان كده ضروري أنك تتعامل كمحترف وكهاوي في نفس الوقت. تتعامل كمحترف في أمور الالتزام بالمواعيد وجودة الشغل. وكهاوي أنك طول الوقت بتتعلم علشان تتقن شغلك أحسن. وتحسن جودته. وأبعد عن الروتين وشغل السوق. خلي شغفك سلاحك. ده مش شغل حكومة. أنت مبدع.

 

الثقة هي كل شيء

ليه العميل هيشتغل مع فري لانسر؟

لأسباب كثيرة أهمها سهولة التعامل بينه وبينك، أو إن شغل الشركات الكبيرة سيء. والأهم إن العميل بيدور على أحسن حاجة بأرخص سعر.

من أهم عوامل بناء الثقة بينك وبين العميل هي الأجر. لو الأجر قليل العميل هيفهم إن شغلك مافيش عليه طلب. ولو غالي بفرق كتير عن غيرك هيعرف أنك بتستغله. خليك عادل في اختيار الأجر. لا تظلم نفسك ولا تظلم العميل. والموقع الوسيط هيضمن حقك.

صحيح البداية صعبة شوية. لكن لو العملاء وثقوا فيك ولقوا منك جدية والتزام كل حاجة هتمشي لوحدها.

 

وفي النهاية هنقدم لك شوية نصائح عن العمل الحر نتمنى إنها تساعدك.

  • ياريت مايكونش العمل الحر هو مصدر الدخل الوحيد، على الأقل في البداية. حاول تلاقي مصدر دخل ثاني.
  • تنظيم الوقت مهم جدًا. والمفروض أنك تتحكم في الوقت. اختار أوقات يكون البيت فيها هادي. حطّ لنفسك مواعيد وقواعد ثابتة إلى حد ما.
  • طول الوقت هتدخل في نقاش مع العملاء. وأكيد تفكيرهم مختلف عن تفكيرك. اسمع كويس من كل الناس. وحاول تلاقي أرض مشتركة تقفوا عليها سوا.
  • أنت محتاج للصبر أكثر من أي حاجة ثانية.

 

وفي النهاية نتمنى لك التوفيق في مشاريعك الخاصة. وافتكر أنك محتاج الصبر أكثر من أي حاجة ثانية.

 

مقترح