The Definitive Guide to Living in the Capital , Cairo , Egypt

أسعار الشقق في مصر أصبحت نار، دي جملة بيرددها عدد كبير من المصريين اللي بيدوروا على شقة في الفترة الأخيرة، لكن هل تعرف إنك ممكن تشتري شقة بمساحة معقولة ومتشطبة سوبر لوكس، وبالتقسيط على 20 سنة، وكمان مدعمة من الدولة؟ في الموضوع ده هنقول لك على كل اللي محتاج تعرفه عن الشقق الجديدة اللي أعلن عنها مؤخرًا صندوق الإسكان الاجتماعي ودعم التمويل العقاري.

الشقق الجديدة أعلن عنها الصندوق بالتعاون مع هيئة المجتمعات العمرانية الجديدة، وهي موجهة في الأساس لمتوسطي الدخل، ومتاحة في عدد من المدن الجديدة، ومساحتها بتتراوح ما بين بين 100م2 و150م2، وهي كاملة التشطيب، وأسعارها بتبدأ من 364 ألف جنيه.

وعدد الشقق بيوصل لـ2271 وحدة موزعة على مستوى 9 محافظات: وهي القاهرة – الجيزة – القليوبية – المنوفية – الشرقية – أسيوط – دمياط – المنيا – قنا)، والمشروعات هي (دار مصر – جنة – سكن مصر).

والشقق دي ضمن مبادرة البنك المركزي المصري لمتوسطي الدخل الصادرة بتاريخ 19 ديسمبر 2019، واللي تم تعديلها في شهر مارس اللي فات، بهدف إتاحة التمويل لمُتوسطي الدخل بسعر عائد 8% مُتناقصة سنويًا لمدة بتصل إلى 20 سنة.

طيب إيه شروط الحصول على شقة؟

شوف يا سيدي، للاستفادة من المبادرة لازم مايكونش الحد الأقصى لدخل الأسرة بيتجاوز 50 ألف جنيه، وبالنسبة للأعزب ما يزيدش دخله الشهري عن الـ40 ألف جنيه.

طيب إيه هي المشاريع اللي موجود فيها الشقق دي؟

المشروع الأول.. سكن مصر:

بتتواجد شقق سكن مصر في 5 مدن بإجمالي 691 شقة، ومن المدن دي (أكتوبر الجديدة – القاهرة الجديدة) كمان بتتراوح المساحات من 106 متر وحتى 118 مترًا.

وبيوصل مقدم الحجز لشقق سكن مصر 40 ألف جنيه، بجانب مبلغ 500 جنيه كمصاريف للتسجيل (لا تسترد).

المشروع الثاني.. دار مصر:

بيتضمن مشروع دار مصر طرح وحدات في 4 مدن، هم (15 مايو – العاشر من رمضان – السادات – حدائق أكتوبر) بإجمالي عدد 575 وحدة سكنية، بمساحات بتتراوح من 130- 140 مترًا.

وبيوصل مقدم الحجز لشقق دار مصر 60 ألف جنيه، بجانب مبلغ 500 جنيه كمصاريف للتسجيل (لا تسترد).

المشروع الثالث.. جنة:

أما مشروع جنة فموجود شققه في 4 مدن، منهم: (6 أكتوبر – العبور – الشيخ زايد) بإجمالي عدد 1005 وحدات سكنية بمساحات بتتراوح من 100-150 مترًا.

وبيوصل مقدم الحجز لشقق جنة 80 ألف جنيه، بجانب مبلغ 500 جنيه كمصاريف للتسجيل (لا تسترد).

نيجي للسؤال المهم، إيه هي طريقة ومواعيد التقديم؟

– هيتم فتح باب سداد مقدمات جدية الحجز المطلوبة للمشروعات الثلاثة، وإتاحة الاطلاع على كراسة الشروط المُرفقة على الموقع الإلكتروني للصندوق، بالإضافة إلى تسجيل البيانات الخاصة بصاحب الطلب

وتقديم طلب حجز الوحدات السكنية هيكون لمدة شهر بداية من يوم الأحد 19 يوليو وحتى 20 أغسطس الجاي، حيث سيتم التقديم من خلال البوابة الإلكترونية للصندوق على اللينك ده.

وبعد الحجز والتخصيص، هيتم سداد نسبة 10% من إجمالي ثمن الوحدة كمبلغ استكمال لمُقدم جدية الحجز بعد 3 شهور من تاريخ غلق الحجز بالموقع الإلكتروني، ووقتها هيتم اتاحة شهر كحد أقصى لسداد المبلغ المطلوب.