النهارده في القاهرة: تنورة وحفلات مزيكا وعروض مسرح
Cairo 360
مساء الفل، النهارده اليوم له طابع مميز، الفعاليات مش جديدة لكن الميكس بين الألوان المختلفة دي مش بيتكرر كتير، ودي حاجة حلوة هتساعدنا نجرب جو مختلف، ونتعرف على فنون جديدة. تعالوا نشوف برنامجنا إيه النهارده في القاهرة:
في وكالة الغوري، فرقة التنورة التراثية هتقدم عرض التنورة المستوحى من التراث الصوفي، اللي قايم على فكرة وجود نقطة مركزية لحركة الكون، بيتم ترجمتها في رقصتهم لحركة دائرية شبيهة بحركة الكواكب في الفضاء، العرض هيبدأ الساعة 7:00 مساءً، وسعر التذكرة 5 جنيه للمصريين و 30 جنيه للأجانب.
ولو أنت غاوي مسرح، ماينفعش تفوت معاد فرقة "إنسان" للفنون المسرحية اللي هتقدم العرض المسرحي "زنزانة" في الحديقة الدولية، العرض اللي جاي ضمن فعاليات مهرجان "آفاق" المسرحي، هيبدأ في تمام الساعة 8 مساء ودعوة حضوره عامة والدخول مجانًا.
نيجي بقى للمزيكا والأفلام، هنلاقي حفلة -لليوم الثاني على التوالي- لعازف العود الشهير الفنان العراقي نصير شمة على مسرح قاعة النهر في ساقية الصاوي، هتبدأ الساعة 7 وأسعار التذاكر بتبدأ من: 65 جنيه، وطبعا فعاليات مهرجان القاهرة السينمائي الدولي لسه مستمرة في سينمات كريم وأوديون في وسط البلد، وقاعات ومسارح دار الأوبرا المصرية، بسعر تذكرة حضور 20 جنيه.
مساكم سعيد.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
