The Definitive Guide to Living in the Capital , Cairo , Egypt

خلونا نتفق أن شهر سبتمبر من ساعة ما بدأ وهو كارمنا بزيادة، إجازة عيد طويلة ومهرجانات فنية وفعاليات ثقافية يمين وشمال مخليانا مش ملاحقين على جرعات الانبساط والطاقة الإيجابية.. وشهر حافل بالمنظر ده لازم يكون وداعه لينا على نفس مستوى القوة.

النهارده في القاهرة هنبدأ جولتنا في الفعاليات الفنية والثقافية من مسارح القاهرة اللي هتكون أبوابها كلها مفتوحة علشان تستضيف العروض الفنية المسرحية المختلفة المشاركة في المهرجان الدولي للمسرح التجريبي والمعاصر، أهم العروض فيه لليوم: "الصابرات" من تونس على مسرح العرائس في العتبة الساعة 6:00 مساءً، ومن بولندا على مسرح الفلكي بالتحرير عرض ماريونيت بعنوان "موليير" الساعة 8:00 مساءً، ومن لبنان على مسرح ميامي بوسط البلد عرض "هو الذي رأى" الساعة 10 مساءً، ومن مصر عروض: "نساء شكسبير" على مسرح الطليعة في العتبة الساعة 8:00 مساءً، و "عشم إبليس" على مسرح الجمهورية بعابدين الساعة 9:00 مساءً.

ونسيب المهرجان ونروح لمنطقة أخرى لا تهدأ عادةً، دار الأوبرا، اللي هيستضيف المسرح الكبير فيها العرض الأول لباليه "سبارتاكوس" بتقدمه فرقة باليه الأوبرا، أسعار تذاكر الحضور 50،75،100 جنيه، والبداية هتكون الساعة 8:00 مساءً.

ثم هنكون على معاد آخر مميز من مسرح الجنينة المرة دي اللي هيستضيف حفل غنائي للفرقة اللبنانية "أدونيس" في تمام الساعة 8:00 مساءً، سعر تذكرة الحضور 30 جنيه غير شاملة تذكرة دخول حديقة الأزهر اللي موجود المسرح بداخلها.

ومن درب 17 18 بمصر القديمة ضمن سلسلة فعالياته "مزيكا في السطح" هيستضيف فرقة "مزاج باند" اللي هيبدءوا حفلتهم الساعة 8:30 مساءً، وسعر تذكرة حضورها 50 جنيه.

الموضوع محير جدًا وسط زحمة الفعاليات القوية دي حقيقي، ربنا معاكم في الاختيار بقى، بس الإيجابي في الموضوع أن الانبساط مضمون.