The Definitive Guide to Living in the Capital , Cairo , Egypt

الأيام الزحمة بالفعاليات على قد ما هي بتوفر لنا اختيارات كتير إلا أنها بتخلق لنا مشكلة تانية، وهي أنها بتخلينا محتارين حيرة حقيقية ومش عارفين نروح إيه ونفوت إيه، لكن ما علينا، المهم أننا نتحرك، ونختار ننبسط.

الموعد النصف شهري المنتظر لفرقة "مزاهر" لفنون الزار في المركز المصري للثقافة والفنون "مكان"، الحفل هيبدأ في تمام الثامنة مساءً والدخول بحد أقصى في السابعة والنصف، وسعر تذكرة الحضور 30 جنيه.

وفي ساقية الصاوي هيكون عندنا وجبة فنية "كومبو" في حفل الكوميديان علي قنديل مع فرقة "ميوجن" اللي بتقدم دمج ما بين العروض المرئية وبين الموسيقى المسموعة، سعر تذكرة الحضور 50 جنيه، والبداية 7:00 مساءً.

وفي درب 17 18 بمجمع الأديان بمصر القديمة عندنا معاد مع حفل فرقة "دكان" ضمن سلسلة فعاليات "مزيكا في السطح"، سعر تذكرة حضور الحفل 50 جنيه، والبداية في تمام الثامنة مساءً.

في حين هيستمر العرض المسرحي "المسودة الأولى" على مسرح الفلكي بحرم الجامعة الأمريكية بالتحرير، سعر تذكرة حضوره 30 جنيه، وبدايته الساعة 8:00 مساءً.
عرض مسرحي آخر لكن المرة دي من على مسرح الحديقة الدولية، عرض "أوسكار" من تقديم فرقة "كاركترز" المسرحية، العرض بييجي ضمن فعاليات مهرجان "آفاق" المسرحي، دعوة الحضور عامة والدخول مجانًا، والبداية في تمام السادسة مساءً.

ونختم من جاردن سيتي مع سينما دال في موعد عرضها الأسبوعي اللي هيكون الدور فيه على الفيلم الدانمركي "Pusher"، وكالعادة الدعوة عامة والحضور مجاني، والبداية في تمام السابعة مساءً.

مساكم سعيد.