The Definitive Guide to Living in the Capital , Cairo , Egypt

الحياة في كايرو

بالتفاصيل.. خطة القاهرة لتطوير حديقة الأندلس في وسط البلد

تطوير حديقة الأندلس حدائق القاهرة حدائق تاريخية حديقة الأندلس محافظة القاهرة معلومات عن حديقة الأندلس
بالتفاصيل.. خطة القاهرة لتطوير حديقة الأندلس في وسط البلد
بواسطة
Cairo 360

تصوير: شريف مختار

حديقة الأندلس في وسط البلد واحدة من أهم وأقدم حدائق القاهرة، لكن في السنوات الأخيرة الحديقة التاريخية المهمة دي اتعرضت للإهمال، وعانت من قلة الزوار، علشان كده أعلنت محافظة القاهرة عن خطة لتطوير المكان اللي ظهر في مجموعة من أهم الأفلام المصرية.

محافظة القاهرة قالت في تصريحات إعلامية إنها هتقوم بتطوير الحديقة تحت إشراف وزارة الآثار، بميزانية 30 مليون جنيه.

وأكدت محافظة القاهرة أنه تم الانتهاء من إعداد الرسومات الهندسية لتطوير الحديقة المجاورة لكوبري قصر النيل، عن طريق استشاريين متخصصين من جامعة حلوان، وهتقوم شركة المقاولين العرب بتنفيذ أعمال التطوير تحت إشراف المحافظة وقطاع الآثار الإسلامية بوزارة الآثار.

تصوير: شريف مختار
تصوير: شريف مختار

وهيتم تنفيذ المشروع على مرحلتين، المرحلة الأولى هتشمل تطوير البنية التحتية وإصلاح شبكة الري، وهيتم ري الحديقة بأسلوب التنقيط ورش المياه، كمان هيتم تطوير شبكة صرف النافورة الموجودة فى الجزء الفرعوني من الحديقة.

أما المرحلة الثانية فهتشمل ترميم نماذج التماثيل الأثرية الموجودة داخل الحديقة، وفي حالة استحالة ترميم أي تمثال هيتم عمل نسخة منه ووضعه فى نفس مكان التمثال القديم، بالإضافة لترميم تماثيل ثعابين الكوبرا الموجودة فى الجزء الفرعوني من الحديقة.

كمان هيتم إعادة تشجير الحديقة بالنباتات النادرة اللي تم إزالتها في وقت سابق، وهيتم الاستعانة بالصور الخاصة بالحديقة اللي ظهرت فى بعض لقطات الأفلام ومنها فيلم أمير الانتقام، وده بهدف إعادة شكل الحديقة زي ما كانت في الماضي، مع إضاءتها بالإضاءة البانورامية.

وعلشان تبقوا عارفين، حديقة الأندلس أنشئت سنة 1935، وهي عبارة عن جزئين، جزء جنوبي عربي أندلسي، وجزء شمالي فرعوني، وبتقع فى موقع مميز جدًا، لأنها بتطل على النيل من الشرق وعلى أول شارع الجزيرة من الغرب، ومن الشمال بتطل على إستوديو الجيب، أما من الجنوب فبتطل على ميدان الأوبرا الجديدة وأول كوبري قصر النيل.

مقترح