بالخطوات.. كل اللي محتاج تعرفه عن أبلكيشن “قطارات مصر” لحجز التذاكر أونلاين
احجز قطر أونلاين تطبيق القطارات حجز عن بعد حجز واستعلام القطارات سكك حديد مصر قطارات مصر قطر مصر
Mohamed Talaat
أطلقت هيئة سكك حديد مصر تطبيق جديد بعنوان “قطارات مصر: حجز واستعلام”، وإحنا في كايرو 360 قررنا نجرب الأبليكيشن ونقول لكم رأينا عشان نقدر نساعدكم في سرعة الحجز لو محتاجين تشتروا تذاكر من خلال الخدمة دي.
التطبيق ده حتى الآن بيشتغل على الأندرويد فقط، ولسه مانزلش لنظام IOS، وتقدر تحمله من على جوجل بلاي من خلال البحث عن “قطارات مصر: حجز واستعلام“، أو الضغط على اللينك ده، وهتحمل التطبيق بسرعة لصغر حجمه.
هتعمل تسجيل دخول لو عندك حساب قديم على الموقع، ولو مش عندك هتعمل حساب جديد الأول، وبعدين تدخل على الأكونت بتاعك وهتظهر لك 4 خيارات “استعلام – الحجز – رحلاتي – المقترحات.
لو عاوز تستعلم عن القطارات والمتاح فيها بتدخل على استعلام وفي الحالة عندك اختيارين، استعلام عن اللي متاح للتذاكر على الانترنت أو عن طريق الشباك، وبتختار طبعًا اللي يعجبك، واخترنا المتاح على الانترنت، لأن ده الهدف من الأبليكيشن، وكتبنا محطة القيام والوصول والتاريخ والموعد المطلوب، وننصحك تقرأ الشروط والأحكام كويس جدًا، لانك مش هتعرف تحجز غير لما توافق عليها، وهي فيها شوية روتين مهم.
بعد كده خرجنا من خدمة الاستعلام ودخلنا على الحجز، وطلبنا حجز من القاهرة للإسكندرية، وحددنا الموعد والدرجة المكيفة، وعدد الكراسي المطلوبة.
وبيطلب منك الإسم، حتى يتم استكمال العملية، وننصحك تكتب اسمك اللي في البطاقة ولو قرأت الشروط كويس هتبقى عارف ليه.
بيظهر لك بعد كده القطارات المتاحة والمواعيد وعدد الكراسي، وسعر التذكرة، وتضغط على الوقت والقطار المناسب لك.
بعد ما تختار قطارك بيظهر نافذة جديدة اسمها “تأكيد الحجز”، ودي بتظهر لك محطة الوصول والقيام ورقم القطار والسعر ورقم الحجز، واسم المسافر والموعد المحدد.
بعد ما تضغط “استمر” هتتنقل لصفحة الدفع، وهنا عندك اختيارين أما عن طريق الفيزا أو ماستر كارد، وده على حسب اصدار بطاقتك البنكية.
بعد ما تختار تملأ بيانات المسجلة على بطاقة الدفع ” رقم الكارت – تاريخ الصلاحية – الكود السري اللي خلف البطاقة”، وهو بيكون محدد القيمة اللي لازم تراجعها كويس، وبعدين تضغط على الدفع.
وفي بعض البنوك لازم تبعت لك كود سري للدفع قبل اتمام العملية وبنوك تانية بتدفع على طول، وبكده بتظهر تذكرتك، وتقدر تاخدها سكرين شوت، وتخليها معاك وتركب بيها القطر أو تطبعها على ورقة عادية زي ما تحب، ونتمنى لك رحلة سعيدة.
الهيئة كانت أعلنت أن المواطن يقدر يختار الكرسي بنفسه، ولكن حتى الآن مافيش الخدمة دي في التطبيق، ونتمنى إنها تتوفر الفترة اللي جاية، و كبداية من وجهة نظرنا هي كويسة.
عجبنا السرعة في الحجز، لكن ضايقنا إن خدمة الدفع فقط ببطاقات بنكية، لإن فيه خدمات تانية زي فوري مثلًا هتفيد الناس اللي ما عندهاش بطاقات بنكية.
مقترح
الحياة في كايرو
شارع الألفي.. باريس في قلب القاهرة
أهم مباني شارع الألفي تاريخ شارع الألفي +3
الحياة في كايرو
