The Definitive Guide to Living in the Capital , Cairo , Egypt

رحلة وتصوير: محمد طلعت

استقبلت شوارع القاهرة مؤخرًا خدمة جديدة وهي الأتوبيس أبو دورين، وده أتوبيس صنع بمكونات مصرية بنسبة 65%، وهيئة النقل العام حددت له 5 جنيهات كسعر للتذكرة، وعلشان كده كايرو 360 قررت تجرب الأتوبيس وتنقل لكم الصورة الكاملة عنه.

بدأ التشغيل بخطين فقط للأتوبيس الأول “المرج – الجامعة الألمانية”، وبيتحرك من محطة مترو المرج، وهيمشي في طريق السويس، والقاهرة الجديدة، وصولًا للجامعة الألمانية.

أما الخط الثاني، فهيكون “حدائق القبة – الجامعة الأمريكية”، وتبدأ الرحلة من حدائق القبة – كوبري القبة – كوبري الفنجري – أرض المعارض – نادي السكة – محور المشير – شارع التسعين – الجامعة الأمريكية”.

الأتوبيس نفسه بداية جيدة جدًا للتصنيع المصري، والتخفيف على سكان القاهرة الجديدة من خلال أتوبيسات تساعد على تخفيف الإختناق المروري، وتوفير الأموال، بسبب إن سعر التذكرة رخيص مقابل الخدمة المتقدمة، وكمان الأتوبيس بيشيل 68 راكب، 17 بالدور الأرضي، و51 بالعلوي، وطوله 12 متر ومكيف الهواء.

الأتوبيس مافيهوش وصلات شحن USB وكمان الواي الفاي لسه مش شغال وهيتم تشغيله قريب، والكراسي من النوع المتين والتي انتشرت في السنوات الأخيرة مع الأتوبيسات الجديدة، وعلشان تطلع للدور العلوي فيه سلمين، واحد للباب الأمامي والتاني للخلفي بشكل حلزوني، والتكييف كويس جدًا لأنه جديد.

 

الأتوبيس أبو دورين فيه خاصية تتبع علشان يكون مراقب من هيئة النقل العام، والسواقين خدوا دورات مكثفة علشان يكونوا على قدر المسئولية، وفيه شاشة قدام السواق علشان يشوف منها الدور العلوي من خلال كاميرا واحدة أمامية ثابتة.

نتمنى الفترة اللي جاية الإنترنت يشتغل في الأتوبيس ويزودوا له USB لشحن الموبيلات، ويبقى فيه خطوط سير لوسط القاهرة تربطها بالمدن الجديدة.