The Definitive Guide to Living in the Capital , Cairo , Egypt

مشروعات شارع 306 اللي هتكون موجودة في كل محافظات مصر لدعم المشروعات ورواد الأعمال، افتتحت أول موقع ليها في محافظة الجيزة، وبالتحديد في حي الدقي، واللي هيكون موجود في شارع وزارة الزراعة أمام متحف الزراعة، وهيكون مختص بمشروعات المطاعم والكافيهات المتنقلة بتراخيص رسمية ضمن المشروع.

والمشروع متاح للشباب من سن 16 سنة، وفيه منه 4 نماذج، الأول هو أكشاك الطعام، ودي عبارة عن أكشاك ثابتة مختصة بإعداد المواد الغذائية، زي الآيس كريم والسندوتشات اللي مش بتحتاج معدات طهي، ومتاح انها تكون موجودة وسط التجمعات السكنية، وحجم المطعم أو الكرفان هيكون 3 في 3 متر.

النموذج الثاني هيكون شاحنات الطعام، ودي عبارة عن شاحنات ثابتة أو متحركة، وكبيرة الحجم، وممكن يشتغل فيها أي عدد من الشباب وفيها موقد وثلاجة، وبيكون فيه طفاية حريق للتأمين، وكمان فيه جهاز غاو في الجزء الخلفي، وحجمه 2.5 في 5 متر.

أما النموذج الثالث فبيكون عربيات الطعام المتنقلة أو الثابتة متوسطة الحجم، ودي مخصصة للمشروبات وعرض الأكل الجاهز، وبتكون مكونة من 2 خزنة عرض وحفظ الأكل المبرد، وكهرباء، وإضاءات Led ونظام مياه مستقل، وحجمها 2 في 3 متر.

والنموذج الرابع وهو الأصغر بيكون وحدات طعام متنقلة صديقة البيئة، وبيتم استخدامها في إعداد وتوزيع الوجبات السريعة في جميع الأحياء والشوارع “دليفري”، وحجمها بيكون 1 في 0.8 متر.

وعلشان تقدروا تقدموا للمشاركة في المشروع ده محتاجين يكون معاكم بطاقة رقم قومي سارية، وسجلكم الجنائي نظيف، وحاصلين على مؤهل متوسط أو عالي، ومش موظفين في أي جهة من القطاع العام، وفاتورة كهرباء أو غاز باسم اللي هيقدم، أو أحد الأقارب من الدرجة الأولى أو الثانية في حالة اختلاف العنوان عن البطاقة “مع إثبات لدرجة القرابة”، وكمان صحيفة حالة جنائية وشهادة صحية معتمدة، وصورة للشهادة الدراسية، وصورة السجل التجاري والبطاقة الضريبية، في حالة وجود عمل حاليًا.

ومن ضمن الأوراق المطلوبة، بيان الموقف التأميني بتاع المتقدم، و شهادة معتمدة لذوي الاحتياجات الخاصة “إن كان”، وصورة شهادة الموقف من تأدية الخدمة العسكرية أو الخدمة الاجتماعية، مع تقديم وصف تفصيلي لنوع النشاط وقائمة الطعام “مع صور فوتوغرافية للوحدة إن وجدت، و صورتان شخصيتان حديثة، وشهادة من وزارة الصحة والسكان بالخلو من تعاطي المخدرات والمنشطات.

وتقدروا تقدموا في المشروع من هنا وهما هيتواصلوا معاكم وفي حالة قبولكم بتروحوا تقدموا الأوراق بناءً على البريد الالكتروني اللي هيتبعت للمحظوظين اللي هيتقبلوا.