بالصور… “Clubliko” أحلى مكان تستمتع فيه أنت وأطفالك في الشيخ زايد
Clubliko أكتوبر أكل ألعاب الشيخ زايد بيتزا خروجة عيلة دلع أطفالك عروض مسرحية كلابليكو مطبخ مكان لعب أطفال ومطعم
Angie El Batrawy
بتبقى مهمة صعبة على أي أب وأم أنهم يلاقوا مكان يثقوا فيه ويسيبوا أولادهم ويكون كمان بيعلمهم شيء مفيد ومسلي علشان ينمي شخصيتهم ومهاراتهم، ولأن أغلب الأماكن دي مش بتوفر جزء التعليم وبتقتصر على الترفيه، والآباء مش مسموح لهم يبقوا مع أولادهم، فلما سمعنا أن فيه مكان اسمه Clubliko في الشيخ زايد فيه ده وأكتر ما ترددناش لحظة أننا نروح ونكتشفه خاصة لما دخلنا على موقعهم على الإنترنت وقرينا عنهم وشوفنا صور للمكان.
Clubliko موجود في الشيخ زايد، دخلة بالم هيلز، في كومبوند الكرمة ٣، ممكن نعتبر المكان مدينة متكاملة ممكن تقضي فيها يوم كامل من المرح والتعليم لك ولطفلك ومش هتخاف عليهم لأن المكان آمن تمامًا واللي شغالين هناك شاطرين وخبرة في التعامل مع الأطفال.
أول ما الطفل بيوصل بيسجل بياناته، رسوم دخول الأطفال أقل من سنتين بـ 150 جنيه، ومن سنتين: 12 سنة بـ 190 جنيه اليوم كله، وممكن تخرج وترجع تاني عادي في نفس اليوم، وبيلبسوا الطفل Bracelet ما بتتقطعش عليها اسم الأم أو الأب ورقم تليفونه علشان يعرفوا يتصلوا بهم، وكمان بيدوك كارت ممغنط Pass بيفتح الباب علشان تتأكد أن ابنك/ بنتك مش هيفتح الباب ويخرج، الدنيا هناك أمان جدًا، ولو ابنك/ بنتك أقل من 3 سنوات هيدوك Responsible Card لأن الطفل مسئول منك وممكن تدخل معاه مجانًا، لكن فوق 3 سنين بيبقى مسئولية المكان.
المكان عبارة عن دورين مليانين ألعاب ترفيهية وذهنية، وكله مؤمن سواء الأرضيات أو الحوائط، غير الزحاليق والمراجيح فيه مكان بيعملوا فيه Face painting ومطبخ بيتعلموا فيه الطبخ وبياكلوا اللي طبخوه، وفيه جزء اسمه Village فيه مطبخ زى الحقيقي جواه حلل وبوتوجاز وفرن (من غير نار) وبيتزا وجبنة بلاستيك علشان يمثلوا أنهم بيطبخوا، وكمان فيه Supermarket شبه الحقيقي علشان يعملوا Shopping ويتعلموا إزاي يصرفوا الفلوس ويتعرفوا على الحاجات واستخداماتها.
فيه كمان Pizzeria يقدر يخش يعمل بيتزا وفيه فرن شبه الحقيقي بس لعبة، وتوست وخضار، وفيه جزء تاني فيه بلوكات ومكعبات فوم كبيرة بأشكال مختلفة المفروض يبني بها مباني وأشكال من خياله، وفيه الـ Water Table ودي عبارة عن 3 أحواض مليانين مياه ولعب وشبك تصطاد به سمك وبيلبسوا الأطفال جاكيت ووتربروف علشان ما يتبلوش، بس برضه لازم تاخد هدوم احتياطي معاك لزوم البهدلة أو البلل.
بعدين في جزء الـ Outdoor فيه رمل وألعاب بحر وفي الجنينة هيكل عظمي كبير لديناصور كأنه مكتشف ولما يحفروا بيلاقوا حفريات تاني وعظام تانية وآلة كبيرة من الخشب بتطلع مزيكا.
في الدور اللي فوق فيه مسرح عرايس بيتعمل فيه سكتشات وبيتم الإعلان عن العرض قبلها بخمس دقايق في الميكروفون علشان الأطفال تتجمع في المسرح، وفيه كمان أوضة كبيرة للتلوين وأوضة تانية Lego room والـ Face painting، ممكن تعرف كافة الأنشطة واللعب اللي هناك من اللينك ده على موقعهم.
المكان مش للأطفال بس، للكبار كمان، إحنا شخصيًا لعبنا في المراجيح واستمتعنا بوقتنا، كمان عندهم مطعم ممكن تقعد تستمتع فيه بأكل حلو أو تتفرج على التليفزيون وأطفالك بيلعبوا في منطقة الألعاب وأنت متطمن.
بالفعل دخلنا المطعم وجربنا الأكل فيه، المكان شيك والجرسونات مهذبين وفيه شاشة كبيرة علشان الناس تتفرج على ماتشات كأس العالم، عندهم منيو زي أي مطعم، من قسم الشوربة طلبنا Mushroom Cappuccino Soup بـ 44 جنيه، استغربنا جدًا من اسمها لكن الجرسون وضح لنا أن بيبقى عليها فوم من فوق فتحس أنها عاملة زي الكابتشينو، ومن الأطباق الرئيسية طلبنا فراخ محشية سبانخ وجبنة (88 جنيه) ومعاها سوتيه وبطاطس ويدجز، وبيف ميداليون (137 جنيه) عليها صوص فلفل وطلبنا معاها خضار سوتيه وبطاطس بيوريه.
الأكل ما أخذش وقت طويل، حصل بس لخبطة الويدجز نزلت مع البيف والبيوريه مع الفراخ، الفراخ كانت تتبيلتها وتسويتها ممتازة، كنا محتاجين نحس بطعم السبانخ أكتر فيها، السوتيه كانت تسويته كويسة والخضار كان متنوع أكتر من المطاعم التانية، الويدجز كانت رائعة، طبقة مقرمشة من بره واللحم بتاع البطاطس طرى ومستوى كويس من جوه، البيف كان قوي جدًا برضه، اللحمة مستوية Well Done زي ما طلبنا وطرية وصوص الفلفل كان رائع والبيوريه كان كويس بس كميته عاوزة تكتر شوية، الشوربة رغم أننا كنا متحمسين لها لكن ما لقيناش طبقة الفوم اللي قالوا لنا عليها، بس طعمها كان حلو جدًا ومختلف والـ Seasoning كان طعمه واضح.
من المشروبات اختارنا ميلك شيك فراولة (35 جنيه) ومن الحلويات Warm Chocolate بـ 46 جنيه الجرسون قال لنا أنها عاملة زي مولتن كيك، الميلك شيك جالنا الأول قوامه مضبوط وسكره كمان وكان منعش، كيك الشوكولاتة اتأخرت جدًا جدًا لدرجة افتكرنا الجرسون نسي الأوردر، لكن هو اعتذر لنا وقال أن سبب التأخير لأنها اتحرقت والشيف عمل واحدة غيرها، لما جات لنا كانت محبطة شوية لأن الشوكولاتة تقيلة وقوامها ما كانش مضبوط، بس اللي خفف من طعمها شوية بولة آيس كريم الفانيليا اللي نزلت معاها.
زيارتنا لـ Clubliko كانت ممتعة ومبهجة خلتنا نرجع صغيرين ونعيش أوقات حلوة مع أولادنا، المكان معقم ونظيف دايمًا، وفيه أماكن للصلاة للرجالة والستات، وفي الحمامات مراعيين فرق الأطوال والأحجام، كل حاجة للكبار جنبها زيها للصغيرين على قد طولهم سواء الأحواض أو التواليت علشان الأطفال تقدر تتعامل وتعتمد على نفسها، وكمان تقدروا تعملوا عيد ميلاد أولادكم هناك، ولو أنت مش قادر تودي ابنك/ بنتك هما بيوفروا توصيل (للأطفال فوق 6 سنوات فقط) من عند البيت (من الأحد للخميس) مقابل 210 جنيه، لكن لازم الآباء ييجوا ياخدوا أولادهم قبل ما يقفلوا بساعة، مواعيد المكان من السبت للأربعاء 10 صباحًا: 7 مساءً، والخميس والجمعة من الساعة 12: 9 مساءً.
l’
من مميزات المكان إننا حسينا إننا رجعنا أطفال تاني وكنا مع أولادنا وهما بيلعبوا وفرحانين.
والمكان محتاج Google maps علشان توصل له لأنه مش على الطريق الرئيسي وكمان لما تدخل الطريق من جوه مافيش أي يافطة ترشدك لمكانهم. وشوف كمان صفحتهم على الفيسبوك وتابع الأنشطة المختلفة اللي بيعملوها كل أسبوع.
