The Definitive Guide to Living in the Capital , Cairo , Egypt

لازم نعترف إن الإيرادات والأرباح المادية اللي بتحققها الأفلام، تعتبر عامل مهم من العوامل اللي نقدر من خلالها نحكم بيها على مدى نجاح أو فشل الأعمال الفنية دي. علشان كده جمعنا لكم من خلال الموضوع ده مجموعة من الأفلام اللي حققت أعلى إيرادات في سنة 2017. وهدفنا إن أي حد فاته مشاهدة فيلم من الأفلام دي يتفرج عليه في 2018 ويشوف هل فعلًا الفيلم كان يستحق يحقق الإيرادات دي؟

تعالوا نتكلم بلغة الأرقام ونشوف أعلى 10 أفلام حققت إيرادات السنة اللي فاتت.

10. Pirates of the Caribbean: Dead Men Tell No Tales

في المركز العاشر بنشوف فيلم Pirates of the Caribbean: Dead Men Tell No Tales بإيرادات 794.9 مليون دولار.

الفيلم من إخراج  واكيم رونينج وإسبن ساندبرج، والسيناريو لجيف ناثانسون. أما البطولة فكانت من نصيب جوني ديب، خافيير بارديم، جيفري راش، وبرنتون ثوياتس مع كايا سكوديلاريو.

الفيلم بيحكي عن الكابتن جاك سبارو اللي بينطلق في رحلة جديدة بيحاول فيها يوصل لرمح بوسايدون الأسطوري. اللي هيمكنه من السيطرة على كل البحار. وهزيمة الأشباح اللي أطلقها عدوه (سلازار)، في محاولة منه لهزيمة القراصنة والسيطرة على السفن الخاصة بهم.

9. Wonder Woman

في المركز التاسع بنقابل فيلم Wonder Woman اللي قدر يحقق إجمالي إيرادات 821.8 مليون دولار. واللي أثار حالة كبيرة من الجدل في وقت عرضه في مصر والدول العربية بسبب جنسية بطلة الفيلم (جال جادوت) الإسرائيلية.

الفيلم بيحكي عن المرأة الخارقة اللي كانت عايشة على جزيرة فيها عدد كبير من الفتيات الأمازونيات. وفى أحد الأيام بتقع طائرة حربية أمريكية على الجزيرة. وبتقدر البطلة (ديانا) إنها تنقذ الطيار الأمريكي. وبيحكيلها عن الحرب العالمية الأولى اللي بتدور في العالم وقتها. ديانا بتقرر تشارك في الحرب علشان تحقق حلمها ومهمتها الأساسية اللي بيدور حواليها الفيلم.

الفيلم من إخراج باتي جينكينز، ومن بطولة جال جادوت، كريس باين، وروبن رايت مع كوني نيلسن ولوسي ديفيس.

8. Thor: Ragnarok

المركز الثامن من نصيب Thor: Ragnarok واللي حقق إجمالي إيرادات 850.4 مليون دولار.

الفيلم بيبدأ بهجوم قوي وعنيف من (هيلا)، وتنفي (ثور) خارج عالمه. لكنه بيقدر يتحد مع (هالك) علشان يكون فريق موازي يقدر يتصدي لـ (هيلا)، وينقذ العالم من مصير مظلم جدًا.

الفيلم من تأليف كريج كايل وكريستوفر يوست ومن إخراج تايكا وايتيتي. ومن بطولة كريس هيمسورث، توم هيدليستون، كيت بلانشيت، إدريس إلبا، وجيف جولدبلوم.

وعرفنا أن كيت بلانشيت علشان تقدر تقوم بدورها في الفيلم اضطرت تلتحق بصفوف تعليم الكابويرا، وهو فن قتالي حديث نسبيًا.

7. Guardians of the Galaxy Vol. 2

أما المركز السابع فراح لفيلم Guardians of the Galaxy Vol. 2. واللي حقق 863.7 مليون دولار.

فيلم Guardians of the Galaxy 2 من بطولة كريس برات، زوي سالدانا، والمصارع ديف باتيستا. بالإضافة لمشاركة النجم سلفستر ستالون. وفين ديزل بالأداء الصوتي لشخصية جروت، واللي قام بمحاكاة مرئية للشخصية في الجزء الثاني.

الفيلم من إخراج وتأليف جيمس جن، اقتباسًا عن القصة المصورة الخاصة بدان إبنيت.

الفيلم منقسم لتلات فصول رئيسية. الأول مغامرة جديدة لفريق من المغامرين الأخيار، اللي بياخدوا على عاتقهم حماية المجرة. والثاني اكتشاف البطل بيتر كويل معلومات جديدة عن حياة والده وحقيقة شخصيته. والثالثة محاولة شرير الفيلم (يوندا) الانتقام من مجموعة حماية المجرة.

6. Wolf Warrior 2

بنشوف في المركز الخامس Wolf Warrior 2 بايرادات 870.3 مليون دولار.

الفيلم بيحكي عن أحد عناصر القوات الخاصة اللي بيستمتع بحياته بعد التقاعد في مدينة هادئة. لكن كتير من عوامل الخطر بتبدأ في الظهور من جديد علشان يبدأ يستعيد قدراته القتالية ويدافع عن المدنيين المحيطين به.

الفيلم من أخراج جينج وو، وتأليف كوين دونج. ومن بطولة جينج وو، فرانك جريلو، وسيلينا جيد.

5. Spider-Man: Homecoming

بإيرادات 880.2 مليون دولار بيتربع في المركز الخامس فيلم Spider-Man: Homecoming الفيلم بيحكي عن بيتر باركر، الشاب المتهور صاحب الـ 15 سنة، اللي مستمر في استخدام قدراته في مساعدة الناس. بعد اللي حصل في أحداث فيلم Captain America: Civil War. بالإضافة لمحاولاته الفاشلة في التواصل مع توني ستارك. لحد ما يظهر خطر جديد بيهدد نيويورك، وهو اللي بيتصدى له.

الفيلم إخراج جون واتس وتأليف جوناثان غولدشتاين م. وجون فرانسيس دالى. أما بطولة الفيلم فكانت من نصيب توم هولاند اللي قام بدور سبايدر مان، ماريسا تومي، روبرت داوني جونيور، دونالد جلوفر، جان فافريو وجونيث بالترو.

4. Despicable Me 3

في المركز الرابع وبايرادات 1.033.5 مليار دولار بنشوف الجزء الثالث من سلسلة Despicable Me الشهيرة.

الفيلم بيحكي عن (جرو) اللي بيقرر يواجه عدوه بلتازار برات، المهووس بفترة الثمانينيات والتسعينيات الفنية وتيماتها الغنائية والتمثيلية. وفي وسط المواجهة بتظهر أحداث وشخصيات جديدة بتزود إثارة الأحداث.

الفيلم إخراج كايل بيلادا وتأليف سينكو بول. والبطولة لـ ستيف كاريل، كريستين ويج، جيني سليت مع راسل براند وآندي نيمان.

3. Star Wars: The Last Jedi

بيطلع للمركز الثالث فيلم Star Wars: The Last Jedi بايرادات 1.229.7 مليار دولار.

الفيلم بيحكي عن راي اللي بتبدأ رحلتها في عالم الجيداي مع سكاي ووكر. وبتكتشف من خلالها أسرار كتير عن الماضي

الفيلم من بطولة جون بويجا، دايزي ريدلي، مارك هاميل. ومن أخراج وتأليف ريان جونسون.

2. The Fate of the Furious

بايرادات 1.236 مليار دولار بيسيطر الجزء الثامن، لواحدة من أشهر سلاسل أفلام السرعة وسباقات السيارات في العالم، على المركز الثاني.

الفيلم إخراج إف. جاري جراي، وتأليف كريس مورغان. أما طاقم التمثيل فضم نفس الوجوه المعتادة: فين ديزل، جيسون ستاثام، دوين جونسون، تيريس جيبسون، ميشيل رودريغيز، وغيرهم من الأبطال.

الفيلم بيحكي عن (دوم) اللي كان بيقضي شهر العسل مع زوجته (ليتي) في كوبا. لكنه بيضطر يرجع من جديد لعالم الجريمة، وينقلب ضد أصحابه. وده بيحط باقي الفريق قدام تحدي جديد وخطير.

1. Beauty and the Beast

أما الفيلم صاحب المركز الأول معانا وبأيرادات 1.263.5 مليار دولار، هو Beauty and the Beast.

الفيلم بيحكي عن بنت جميلة أسمها بيل، بيتم اختطاف والدها على إيد وحش ضخم ومرعب. ولما بتحاول تنقذه، بينتهي بها الأمر محبوسة مكانه. من هنا بتبدأ بيل تعرف شخصية الوحش عن قرب. وبتكتشف مع الوقت إن سلوكه السيء مجرد عرض جانبي، لكنه في الحقيقة أفضل بكثير من الشكل البشع اللي بيبدو به. لحد ما تعرف سر خطير عن ماضيه.

الفيلم من بطولة إيما واتسون، دان ستيفنز، لوك إيفانز، مع جوش جاد، كيفين كلاين، وإيان ماكلين. إخراج بيل كوندون وتأليف ستيفن شوبسكي.