The Definitive Guide to Living in the Capital , Cairo , Egypt

من المعروف عن السينما المصرية إنها من أعرق وأقدم السينمات على مستوى العالم، وكانت من أوائل السينمات اللي ظهرت في العالم، والأولى في الشرق الأوسط، وفي ديسمبر 1895 كان موعد العالم مع أول عرض سينمائي تجاري في باريس، وفي مصر كان أول عرض تجاري في نوفمبر 1896، وكان في مدينة الإسكندرية، وعلشان كده تاريخنا في السينما مهم جدًا، وفي السطور اللي جاية، هنقولكم كل اللي محتاجين تعرفوه عن أقدم 3 سينمات في مصر:

بورصة طوسون باشا:

تخيلوا إن أول سينما في مصر ماكنتش في القاهرة، ولكن نالت الشرف ده مدينة الإسكندرية، وده كان سنة 1896، وكانت موجودة في شارع فؤاد، واتكونت من عدة أدوار وقاعات، وكانت الجاليات الأجنبية بتستخدمها في تنظيم حفلاتها، واتعرض فيها أفلام قصيرة كتير ومنها (المصارعون، المتجرد من ثيابه، أهالى مدغشقر، وغابة بولونيا) وكانت بتعرض كل نصف ساعة فيلم وكانت مواعيدها من 5 العصر لـ 11 مساءً.

أوليمبيا:

تاريخ سينما أوليمبيا بيرجع لأكثر من 100 سنة، ولسة لحد النهارده موجودة في شارع عبد العزيز في العتبة، والأرض اللي اتبنت عليها كانت ملك للخديوى توفيق، واللي أهداها للشيخ سلامة حجازي علشان يبني مسرح عليها، لأنه كان عاشق للفن، وكانت أول مسرح فني.

سنة 1911 اتحول المسرح الفني لسينما عن طريق “المسيو باردى” وانفردت “أوليمبيا” بأنها تبقى أول سينما دخلت الترجمة العربية على الشاشة باستخدام ألواح زجاج عن طريق “الفانوس السحري” وكان الأديب العالمي “نجيب محفوظ” اتكلم عنها وقال إنه عرف طريق السينما لما دخلها مع والده لأول مرة، وإنه لما شاف “قطار” بيتحرك على الشاشة بسرعة صرخ من الخوف.

فريال وفاروق:

أما ثالث أقدم سينما في مصر، فكانت في جنوب الصعيد، وبالتحديد في محافظة “قنا” وده كان في ثلاثينيات القرن اللي فات، ومش معروف التاريخ الحقيقي لبناءها، وكان على يد “لوقا بسطا” وإخوته.

السينما دي كان بيديرها لسنوات طويلة والد سيدة الشاشة العربية “فاتن حمامة”، ولحد ما اتهدت سنة  2015 فضلت زي ما هي بإسمها، وبعدين اتحولت لمحلات تجارية، بعد فشل محاولات إقناع الورثة “25 وريث” بإنهم يجددوها ويبنوها.

تاريخ السينما المصرية متوقفش عند إنشاء دور العرض والأفلام الصامتة وبس، ولكن فيه تاريخ كبير موجود زي سينما “مترو” اللي كانت أول دار عرض مكيفة في مصر، واتأسست سنة 1940، وسينما “تريومف” اللي اتعرض فيها أول فيلم أجنبي “مدبلج” وده كان سنة 1938، وسينما “رمسيس” اللي اتبنت سنة 1931 وكانت السينما الوحيدة اللي عروضها مش بتفرق ما بين المصريين والأجانب.