The Definitive Guide to Living in the Capital , Cairo , Egypt

من حوالي أسبوع، وصل البلوجر التركي الشهير “كوكسال بابا” للقاهرة، في زيارة هي الأولى من نوعها، وبدأ ينشر على حساباته المختلفة صور له من المطار وبعدها انتشرت صور له من افتتاح مطعم كباب بالقاهرة الجديدة وغيرها من الصور اللي بتوثق رحلته، لكن فيه ناس كتير مش عارفة مين الشخص ده.. تعالوا نتعرف عليه أكتر.

بيتبادل كتير من رواد مواقع التواصل الاجتماعي في العالم كله، صور مختلفة لشخص له شكل مميز وتعبيرات كوميدية، للتعبير عن مواقف معينة بشكل ساخر، الشخص ده هو “كوكسال بابا”، اللي حقق شهرة واسعة على السوشيال ميديا، وامتدت شهرته لحد ما أصبحت صورته “ستيكر” أساسي بيتبادله المستخدمين عبر تطبيق واتس آب للرد على محادثاتهم مع بعض.

حكاية “كوكسال بابا”

اسمه “بكتاش أوغلو” واشتهر باسم “كوكسال بابا”، وهو بلوجر تركي من مواليد عام 1975، بمدينة طرابزون اللي بتقع على الساحل الشمالي لتركيا.

اتولد البلوجر التركي بمرض وراثي نادر بيؤثر على عملية النمو، والأمر ده تسبب في قصر قامته ومظهره المميز اللي بيعتبر سبب رئيسي في الشهرة اللي نالها، وهو عايش مع عمه بسبب إن والديه متوفيين.

وعلى الرغم من مرضه إلا أنه كان شغوف بلعبة الملاكمة، وقدر يكون ملاكم، ودائمًا بيفخر بفوزه ببطولة الملاكمة التركية للناشئين لمدة 3 سنين على التوالي، لكنه اعتزل الملاكمة سنة 2010.

سنة 2015 بدأ “كوكسال بابا” في اقتحام عالم السوشيال ميديا، بنشر مقاطع فيديو طريفة بيرصد من خلالها تفاصيل يومه، وبسرعة شديدة تفاعل معه المتابعين، اللي وصل عددهم لملايين من بلاد مختلفة بتشمل بلده الأم والعالم العربي وأسيا وأوروبا.

وكانت بداية شهرته الحقيقية سنة 2016 لما نشر فيديو، ظهر خلاله وهو بيهاجم راجل أضخم منه في الشارع، ووقتها حقق الفيديو مشاهدات مرعبة، وصلت لأكثر من 6 مليون مشاهدة، ومن وقتها بقى معروف بإنه شخص عصبي بيعبر عن عصبيته بطريقة كوميدية.

“كوكسال بابا” عنده النهارده ملايين المتابعين على حسابه على إنستجرام، وتطبيق تيك توك، ويوتيوب.

ومن فترة أهدى الرئيس التركي رجب طيب أردوغان لـ “كوكسال بابا” عربية حمراء بتشتغل بالبطارية، زي عربيات الأطفال، وده بعد ما عرف أنه عاشق للعربيات.