The Definitive Guide to Living in the Capital , Cairo , Egypt

لو كنتم من المهتمين بالقاهرة التاريخية وأماكنها العظيمة فعندنا خبر مهم علشانكم.. وهي إن مجلس الوزراء المصري وافق على اعتبار مشروع تطوير وتأهيل وإحياء مناطق القاهرة التاريخية من المشروعات القومية اللي بتنفذها الدولة، طيب الخطوة دي معناها إيه؟ تعالوا نعرف مع بعض، ونعرف كمان تفاصيل المشروع المهم ده.

خطوة اعتبار مشروع تطوير وتأهيل وإحياء مناطق القاهرة التاريخية من المشروعات القومية اللي بتنفذها الدولة معناها إن المشروع ده هيسري عليه الاستثناء من الاشتراطات البنائية المعمول بيها في القاهرة، وكمان هيتم بحث عدد من البدائل المتعلقة بالتعامل مع شاغلي الوحدات السكنية وغير السكنية داخل نطاق المشروع، وده بهدف تحقيق أهداف الدولة من وراء المشروع الحضاري ده في توطين الحرف اليدوية وإعادة إظهار رونق المناطق الأثرية دي وقيمتها التاريخية.

إيه هو مشروع تطوير مناطق القاهرة التاريخية؟

بتعتبر مدينة القاهرة التاريخية أحد أبرز المدن التراثية القديمة على مستوى العالم، وتم تسجيلها على قائمة مواقع التراث العالمي باليونسكو سنة 1979م، وهي مدينة غنية بآثارها المعمارية والفنية اللي بترجع للفترة التاريخية الممتدة ما بين العصر الروماني وعصر أسرة محمد علي.

وبهدف االحفاظ على القاهرة التاريخية تم تدشين مشروع تطوير القاهرة التاريخية عام 1998م اعتمادًا على الدراسة التى أعدها برنامج الإنماء التابع للأمم المتحدة (UNDP)، وبناء عليه تم إنشاء مركز لدراسات تنمية القاهرة التاريخية، وإعداد قاعدة بيانات بالتعاون مع مركز معلومات مجلس الوزراء باستخدام نظم المعلومات الجغرافية (GIS)، وتم وضع برنامج لحماية وصيانة المباني الأثرية والتاريخية بنطاق المشروع بينقسم لـ 4 مراحل بتشمل 149 أثر.

وبيتضمن المشروع أعمال الحفظ والترميم والصيانة وإعادة التوظيف بمناطق الجمالية، والأزهر، والغورية، والدرب الأحمر، وباب الوزير؛ بالإضافة لبعض مشروعات الترميم المستقلة زي الخاصة بمسجد أحمد بن طولون، وبيت السادات، وقصر الأمير طاز، وقصر محمد علي بشبرا، وسور مجرى العيون؛ ومشروعات البعثات والمنح الأجنبية للحفاظ والترميم زي اللي في قبة شجر الدر، ومشهد السيدة رقية، وقبتي عاتكة والجعفري بشارع الخليفة، ومقعد وحوض قايتباي بجبانة المماليك بشرق القاهرة؛ بالإضافة إلى مشروعات الحفاظ العمراني في القاهرة التاريخية مثل مشروع تطوير شارع المعز وشارع الجمالية، ومشروع إعادة تأهيل حارة الدرب الأصفر، ومشروع إعادة تأهيل مصر القديمة ومجمع الأديان، ومشروع إحياء منطقة السيدة زينب، ومشروع إحياء الدرب الأحمر.

وفى عام 2010م تم التنسيق مع منظمة اليونسكو ومركز التراث العالمي بباريس لإطلاق مشروع الإحياء العمراني للقاهرة التاريخية بتمويل من الحكومة المصرية.

وبتقوم إدارة مشروع تطوير القاهرة التاريخية بمشروعات الحفظ والترميم والحفائر وإعادة تأهيل وتوظيف المباني الأثرية، وده بالتوازي مع مشروعات التطوير الحضري والحفاظ العمراني لشوارع القاهرة القديمة كشوارع المعز، والجمالية، والغورية، وباب الوزير، وسوق السلاح، والخليفة.