The Definitive Guide to Living in the Capital , Cairo , Egypt

طلاب الثانوية العامة في انتظار نتيجتهم! وهي النتيجة اللي بيعتبروها نقطة فارقة في مستقبلهم وحياتهم الدراسية.. في الموضوع ده هنعرفكم –بغض النظر عن مجموعكم في الثانوية العامة- إزاي تختاروا الكلية المناسبة ليكم.

1 – حدد كويس أنت عاوز إيه

أفضل نصيحة ممكن نقدمها لطالب الثانوية العامة هي إنه لازم يحدد كويس هو عاوز إيه في المستقبل، وعلشان تعرف الإجابة على السؤال ده مهم اختيارك للكلية يكون مبني على إمكانياتك ومواهبك بغض النظر عن المجموع، يعني لو بتحب الفن وجبت مجموع عالي في الثانوية العامة مش لازم أبدًا تدرس طب! ممكن تدرس فنون جميلة لو حابب ده.. ادرس اللي هتحس إنك عاوزه يكون مستقبلك.. وخلي المجموع أخر حاجة.

2. هل سوق العمل محتاج تخصصك؟

اللغات وإدارة الأعمال وبناء التطبيقات والمواقع ومهارات الكمبيوتر المختلفة هي نماذج من التخصصات اللي سوق العمل محتاجها، علشان كده قبل ما تدخل كلية لازم تعرف هل سوق العمل محتاج تخصصها لما تتخرج ولا عدد الخريجين بتوعها كتير.. مهم تختار كلية يكون لها مستقبل حقيقي في سوق العمل خلال السنوات الجاية، ومهم تعرف إن فيه كليات كتير رجعت ورا بسبب التكنولوجيا وعدم حاجة سوق العمل لها، وأصبح فيه ألاف الخريجين اللي بيضطروا للعمل بعيد عن مجالاتهم بسبب عدم حاجة سوق العمل لتخصصاتهم.

3 – طور مهاراتك

ابعد خالص عن الحياة التقليدية للطالب المصري العادي، يعني خلال دراستك الجامعية استغل فترة الجامعة في تطوير مهاراتك والحصول على دورات تدريبية سواء في مجالك أو مجالات تانية مرتبطة بمجالك بهدف توسيع مداركك ومواهبك، وعلشان تكون متميز بين أصحابك، وهو ده التعليم الذاتي اللي أصبح متاح عبر الإنترنت.

4 – اتعلم مجال تاني بشكل موازي

وأنت بتدرس في الجامعة اتعلم مجال تاني بجانب مجالك الأساسي، يعني لو بتدرس إدارة أعمال ممكن تتعلم تصميم جرافيك أو تصوير فوتوغرافي، ويا سلام لو كان المجال ده حاجة أنت بتحبها فعلًا، في الحالة دي هتبقى متعلم حاجتين وفرص نجاحك في الحياة هتكون أكبر بكتير، وفيه مواقع كتير بتقدم تعليم أونلاين بشكل مجاني، زي منصة إدراك مثلًا.