The Definitive Guide to Living in the Capital , Cairo , Egypt

الحياة في كايرو

بمناسبة الفلانتين: 7 أسباب تخليك تحب البواب أكتر من أي حد تاني

عيد الحب، الفلانتين، سنجل
بمناسبة الفلانتين: 7 أسباب تخليك تحب البواب أكتر من أي حد تاني
بواسطة
Mohammed Sabry

كله بيعتبر الفلانتين يوم خاص وحصري للشخص اللي بيحبه عاطفيًا. وكل couple بيقعدوا يخططوا هيقضوا اليوم ده إزاي. لكن فيه شخص مهم أوي في حياتنا، كلنا بننساه في يوم زي ده. وهو البواب.. أيوة أنت قريت صح، البواب. ومن هذا المنطلق نحب نقول لكم على شوية أسباب تخلي البواب هو أكتر حد لازم نعبر له عن حبنا له في الفلانتين:

1- بيستقبلك بأحلى ابتسامة

الراجل بيديك بسمة أمل. بذمتك مش هو أول واحد بيضحك في وشك ويصبح عليك وأنت نازل شغلك. ويديك شوية طاقة إيجابية تبدأ بيهم يومك. بدل رخامة الناس في الشارع. أو تكشيرة مديرك وزمايلك على الصبح في الشركة.

2- الملاك الحارس

مش هو ده اللي بيسهر وأنت نايم، يحرس العمارة والعربيات اللي في الجراج؟ اللي لو احتاجته في أي وقت في نص الليل، يا دوب تديله صوت تلاقيه قدامك؟ ولا أسرع ديليفري في مصر.

3- Stylist

وطبعًا البنات ماتنكرش. الراجل مهتم إنه يقول لك لبسك ده قصير أو مكشوف. أو ماينفعش تنزلي بالشكل ده. أو ده لايق أكتر من ده، وهكذا. ده أهلك مابيهتموش بيكي كده يا شيخة.

4- مركز في مواعيدك

أكيد مفيش واحدة بواب عمارتها ماعلقش على مواعيد خروجها ودخولها. واتأخرتي ليه النهارده؟ وكنتي فين إمبارح؟ ويا سلام بقى لو راجعة في أوبر، عينه مش هتنزل من على السواق. هيفتكره واحد صاحبك موصلك، طبعًا الراجل بيحاول يتطمن عليكي مش أكتر.

5- النظافة

سلم العمارة اللي بيبرق من النظافة. أكياس الزبالة اللي كله مكسل ينزلها. ولا عربيتك اللي بتتنضف وتتمسح كويس كل يوم. مين بيعمل كل ده؟ مش البواب برضه ولا حد تاني؟ هو في اهتمام وحب كده يا ناس.

6- طلبات البيت

أي حاجة البيت بيحتاجها من السوبر ماركت. وحتى الأكل اللي بيوصل مع الديليفري أحيانًا البواب هو اللي بيطلعه لحد باب شقتك، ولما يكون في مشكلة في السباكة مثلًا، أو محتاجين كهربائي، بتروحوا لمين غير البواب اللي بيقب ويغطس، ويجيب لكم سباك أو كهربائي أو غيره؟؟

7- أحسن شخص اجتماعي

كام مرة كنت بتتكلم قدامه مع حد تعرفه، ولقيته دخل في الحوار بكل حماس؟ ده أنت حتى ممكن تبقى بتتكلم في الموبايل عن مشكلة قدامه، وبعد ما تخلص تلاقيه بيقولك رأيه. الراجل حاسس بيك أكتر منك. يبقى المفروض تديله اهتمام شوية أكتر من كده. بجد مش ممكن يعني.

يلا بقى شوفوا هتجيبوا إيه للبواب في الفلانتين.

مقترح