The Definitive Guide to Living in the Capital , Cairo , Egypt

الخميس 12 سبتمبر 2019 هيوافق رأس السنة الـ 6261 الجديدة وفقًا للتقويم المصري القديم، واللي يعتبر أقدم تقويم في العالم، والاحتفال بيها بيطلق عليها احتفالات عيد “النيروز” وبتتزامن مع بداية شهر “توت”، أول شهور السنة القبطية، تعالوا نعرف شوية معلومات عن التقويم ده:

1- التقويم المصري القديم، أو التقويم الشمسي “النجمي” هو نظام الحساب الفلكي اللي حطه المصريين القدماء علشان يقسموا السنة، وكانت السنة عندهم وفقًا للتقويم ده عبارة عن 13 شهر، وحساباته مبنية على دورة الشمس، وبيعتبر من أوائل التقاويم اللي عرفتها البشرية، وأدقها من حيث ظروف المناخ والزراعة خلال السنة.

2- بسبب دقة التقويم المصري في ظروف الجو، الفلاحين في مصر لحد النهارده بيعتمدوا عليه في الزراعة، وبيعتبروا عيد رأس السنة المصرية أو المعروف بعيد “النيروز” هو أول يوم في السنة الزراعية الجديدة، وده ربط عيد “النيروز” عند المصريين القدماء بـ “الخير”.

3- كلمة “نيروز” ليها تفسيرين مختلفين، الأول بيعتبرها كلمة فارسية مكونة من مقطعين وهي “نور” و”روز”، يعني “اليوم الجديد” اللي هوه يوم رأس السنة في التقويم المصري القديم.

4- أما التفسير التاني فقال بعض المفسرين للكلمة إنها في الأصل كلمة قبطية وهي “ني – يارؤو” ومعناها “الأنهار”، وده لإن في الوقت ده من السنة بيكون موسم فيضان النيل وصل لقمته.

5- التقويم القبطي أو “تقويم الشهداء” وهو تقويم خاص بالأقباط بيبدأ بسنة 284 ميلادية، وبيعتمد بشكل أساسي على التقويم المصري القديم، وفي العيد ده بتحتفل الكنائس المصرية وبيوزعوا “بلح أحمر” و”جوافة” تيمنًا بعيد النيروز في أول “توت” وبتستمر الاحتفالات لحد يوم 17 توت.