The Definitive Guide to Living in the Capital , Cairo , Egypt

الأماكن القديمة ليها رونق ومكانة خاصة، وده لأنها بتحمل طابع بيمسنا كلنا، وعمارات وسط البلد دائمًا فيها حالة مش موجودة في أماكن كتير، بتنقلك من العالم الحالي لعالم خيالي نفسنا نعيش فيه. مؤخرًا اتعرفنا على مكان اسمه “­­­­­­­­­بنسوار” وهو مساحة عمل مشتركة، (كو وركينج سبيس)، وهناك حسينا إننا سافرنا لزمن الأبيض والأسود الجميل.

في السطور الجاية هنقول لكم على كل اللي محتاجين تعرفوه عن “بنسوار”.

المكان هادي ومريح للأعصاب، وفيه أكتر من كورنر بديكورات مختلفة، وهو وورك سبيس شيك وهادي هيخليكم ترجعوا لزمن الأبيض وأسود، وده نفسيًا هيخلي روحكم تخرج الطاقة السلبية وتستبدلها بالطاقة الإيجابية.

المكان تقدروا تذاكروا فيه وتسهروا وتعملوا حفلاتكم الشخصية وتريحوا أعصابكم وكمان تعملوا فيه محاضرات أو ندوات ودورات في قاعات مجهزة، ومتوفر فيه مأكولات ومشروبات والأسعار تبدأ من 8 جنيه للشاي و15 جنيه للقهوة، وكمان القعدة عندهم ببلاش يعني مش هتدفعوا غير ثمن المشروب بتاعكم.

“بنسوار” ممكن تعملوا فيه عيد ميلاد أو أي احتفال خاص بيكم في مكان برايفت، وده مميز لأنه المكان في عمارة من عمارات وسط البلد العريقة، وكمان تقدروا تلعبوا بلاي ستيشن وتنافسوا أصحابكم في ألعاب كتير، ده غير بقى الفوتوسيشن المميز اللي هتقدروا تعملوا منه أحلى صور وسط ديكورات جميلة.

تقدروا تعرفوا أكتر عن “بنسوار” من خلال صفحة الفيسبوك من هنا.

العنوان: 2  شارع سليمان الحلبي – الدور الخامس – أقرب محطة مترو “أحمد عرابي”.

رقم التليفون: 01159251626 – 01114184630.