The Definitive Guide to Living in the Capital , Cairo , Egypt

مصدر الصور

القاهرة فيها بيوت عظيمة، كل تفصيلة فيها بتحكي حكاية مهمة عن تاريح العاصمة، لكن المشكلة إن بعض البيوت دي مش مشهور بين المصريين رغم أهميته الكبيرة.. ومن البيوت الجميلة في القاهرة، بيت المعمار المصري٬ المعروف باسم بيت علي لبيب٬ واللي أسسه الأخوة عمر وإبراهيم الملاطيلي كسكن لعائلتهم في القرن الثامن عشر، وبعدها اشتهر باسم بيت علي أفندي لبيب، وده اسم حارس البيت.

وبيرجع طراز البيت، للطراز العثماني المتأثر بالعمارة المملوكية التقليدية، وبيعتبر واحد من أجمل البيوت الإسلامية بالقاهرة.

والبيت موجود في منطقة من أهم مناطق القاهرة التاريخية وهي منطقة القلعة، وبالتحديد في درب اللبانة، والبيت معروف هناك باسم “بيت الفنانين” ودرب اللبانة اشتهرت من أواخر ثلاثينيات القرن العشرين بأنها منطقة مونمارتر القلعة، على غرار منطقة المونمارتر بباريس، وده بسبب اجتذابها لكتير من الفنانيين الأجانب والمستشرقين والمصريين للإقامة فيها أو إقامة معارض في مبانيها المختلفة.

سِكن في بيت “علي لبيب” الفنانين بيبي مارتان، موسكا نيللي، راغب عياد، ميلاد فهيم، جمال كامل، رمسيس يونان، لبيب تادرس، محمد ناجي، زكي بولس، سند بسطا، لويس فوزي، منير كنعان، محمد ضياء الدين، عبد الغني أبو العينين، شادي عبد السلام، رؤوف عبد المجيد، عبد الفتاح الكيال، عبد السلام والشريف، وحسن فتحي واللي اقترن البيت بإسمه بعد كدة.

وبيهدف بيت المعمار المصري لنشر الثقافة المعمارية والتواصل مع المجتمع والتوعية بالعمارة والتصميم والعمران والبيئة المبنية والفنون والحرف المرتبطة وده من خلال العرض المتحفي لتراثنا المعماري والبنائي وإلقاء الضوء على المعماريين الرواد ومن خلال الأنشطة التفاعلية المتعددة من المعارض والندوات وورش العمل والاحتفاليات المتنوعة.

البيت بيحتوي كمان على مكتبة بحثية مهمة أقرب لمركز بحثي وأرشيفي، وهتلاقوا فيها محتوى متنوع من الكتب والمراجع والمكتبة الرقمية بمحتواها من الكتب والأبحاث والرسائل والدوريات والمادة الأرشيفية والمجموعات النادرة وده غير المحاضرات المتخصصة المسجلة.

 

عنوان البيت: القلعة، درب اللبانة.

تليفون: 0225117043

المواعيد: من 9 صباحًا إلى 4 عصرًا.