The Definitive Guide to Living in the Capital , Cairo , Egypt

رنا شرف

الخريف هو فصل الحنين والحب والحزن، وهو كمان موسم تجربة حاجات غير تقليدية، لأن هو نفسه فصل غير تقليدي، لا هو صيف، وهو لا شتاء! فكرنا نجرب آيس كريم في الخريف، ولقينا التجربة عظيمة.

اسمحوا لنا نرشح لكم أماكن بتقدم أحلى آيس كريم في القاهرة، تعالوا نتعرف عليهم، ونجربهم في الخريف!

 

سلطانة

من أشهر وأقدم  محلات الآيس كريم في القاهرة، له فروع كتير وأسعاره تعتبر عالية بس مناسبة للجودة. سعر البولة في الكب 37 جنيه، وفي البسكويت أو الوافل 45 جنيه، سلطانة مشهور بالنكهات المتنوعة، زي آيس كريم كولا وشيري وزبادي توت وزبدة فول سوداني.

سلطانة له فروع كتير أشهرهم فرع  الكوربة في13  شارع بغداد.

 

Gelato Mio

من الأماكن المعروفة في عالم الآيس كريم وله جمهوره بسبب النكهات الحلوة والجديدة اللي بيقدمها. عنده آيس كريم صحي بالكركديه، حاجة كده مفتكسة، وآيس كريم باللبان أو غزل البنات، سعر البولة عنده الكب الصغيرة 55 جنيه لنوع أو نوعين، وكب 4 أنواع بـ75 جنيه، والوافل بـ10 جنيه.

Gelato Mio له فروع في الزمالك والمعادي ومصر الجديدة.

    

دولاتوه 

براند لبناني جديد أثبت نفسه في السوق وله نكهاته الحلوة منها توت أزرق ولوتس، آيس كريم دولاتوه بيبدأ سعره للبسكويت أو الوافيل من 15 جنيه، وسعر البولة 35 جنيه، والـ6 بولة بـ210.

 

 باسكن روبنز

براند عالمي مشهور بيقدم أشكال متنوعة من الآيس كريم، عنده الـ3 بولات سعرهم بـ82 جنيه، وبولة العملاق دوبل بـ120 جنيه، وبولة السنجل بـ47 جنيه.

باسكن روبنز له فروع كتير أشهرهم موجود في المهندسين.

 

العبد

من أشهر الخروجات خروجة الآيس كريم في وسط البلد، والعبد هو الكينج في وسط القاهرة! سعر البولة 12 جنيه، وده أرخص سعر للآيس كريم في محلات القاهرة المعروفة، وعنده كل النكهات وبجوده عالية جدًا.

 العبد له فروع كتير أشهرهم موجود في وسط البلد.