The Definitive Guide to Living in the Capital , Cairo , Egypt

الحياة في كايرو

تطبيق Dawar.. بلغ من تليفونك عن مقالب القمامة في 6 مناطق في القاهرة

أبليكيشن دور التنمية المستدامة تحميل تطبيق دور - Dawar تطبيق DAWAR تنظيف القمامة منتجات صديقة للبيئة نظافة القاهرة وزارة البيئة
تطبيق Dawar.. بلغ من تليفونك عن مقالب القمامة في 6 مناطق في القاهرة
بواسطة
Mohamed Talaat

فكرة أن منطقتكم تكون نظيفة أصبحت مش مستحيلة دلوقتي، وده بعد ما وزارة البيئة وهيئة النظافة والتجميل بالتعاون مع شركة Environ Adapt، حدثت خدماتها في القاهرة الكبرى كبداية أنها تغطي الجمهورية كلها بأبليكيشن “دور” اللي من خلاله تقدروا تبلغوا عن تجمعات القمامة وخلال 48 ساعة بالكتير هتكون المنطقة نظيفة، وفي السطور الجاية هنعرفكم أكثر على أبليكيشن “دور – Dawar” وطريقة استخدامه.

فكرة المشروع جت بسبب مشكلة القمامة اللي بتكون منتشرة في بعض الشوارع، واللي بيكون بسبب عدم القدرة علي تقييم آداء مقدمي خدمة شركات النظافة، واللي تقييم أدائهم كان بيكون من خلال تقارير ورقية روتينية، ولكن تم استبدال التقارير الورقية دي بأبليكيشن “دور”، اللي تقدروا من خلاله تصوروا القمامة أو المخلفات في الشارع وتبعتوها، وخلال 48 ساعة على أقصى تقدير بيتم إزالة المخالفة بعد إبلاغ شركة النظافة وكمان هيبلغوكم من خلال صورة لنظافة المكان و بهذا يمكن تقييم اداء خدمة شركات النظافة بشكل موثق.

مصطفي خيرت، المدير التنفيذي لشركة Environ Adapt، مؤسسة الأبليكيشن، قال لـ”كايرو 360″، أن الأبليكيشن بيرصد بنظام رقمي متطور توقيت وتاريخ الصورة اللي بيبعتها المشترك بشكل آلي وبعد لما المكان بينظف يقوم عامل نظافة شركة مقدمي الخدمة بارسال الصورة بعد إزالة المخالفة علشان تقدروا تقيموا الخدمة المقدمة، وده بداية لنظام متكامل هيتعمل العمل فيه في ٧ محافظات في الجمهورية ، وحاليًا الأبليكيشن بيخدم 6 مناطق في القاهرة، “المعادي – مصر الجديدة – طرة – روض الفرج – شبرا مصر – وسط البلد”، وجاري التوسع في الجيزة والإسكندرية اللي هيكونوا ضمن منظومة النظافة الرقمية قريب.

كل اللي عليكم أنكم تصوروا صورة للمخالفة وتلقائي الأبليكيشن بيحدد المنطقة والتوقيت، وبعدها بيتم إرسال الصورة لمقدم الخدمة “شركة النظافة” في كل منطقة، وبيتم إزالة المخالفة وإعادة إرسال صورة للمستخدم اللي بعت الصورة لتقييم الخدمة المقدمة.

وبدء عمل الأبليكيشن من سنة 2018، وقدموا الخدمة حتى الآن لأكثر من 40 ألف مشترك، والأبليكيشن كمان بيوفر خدمة الأخبار المحلية والعالمية عن البيئة والاستدامة بطريقة بسيطة وكمان بيعرض منتجات محلية الصنع صديقة للبيئة.

تقدروا تعرفوا أكتر عن أبليكيشن “دور – Dawar” وطرق استخدامه من خلال صفحة الفيسبوك من هنا.

وتقدروا تحملوا الأبليكيشن لمستخدمي هواتف iOS من هنا.

ولمستخدمي هواتف أندرويد من هنا.

مقترح