The Definitive Guide to Living in the Capital , Cairo , Egypt

بعض السيدات بيكون عندهم تخوف من استخدام وسائل المواصلات في القاهرة، وده لأنهم مش بيحسوا بالأمان، أو علشان المشاكل اللي ممكن تحصل تحت أي ظرف، ولو أم حابة توصل أولادها للتمرين أو المدرسة بتبقى قلقانة طول الوقت لأسباب كتير أهمها غريزة الأمومة، وعلشان المشاكل دي وأكتر ظهر أبليكيشن جديد اسمه Female، وده بيعتمد على توصيل البنات والأطفال عن طريق كباتن سيدات.

خلال السطور الجاية هنقول لكم على كل اللي محتاجين تعرفوه عن الأبليكيشن والخدمات اللي بيقدمها.

 

حنان مصطفى صاحبة الفكرة كانت دايمًا عندها مخاوف لما تطلب وسيلة مواصلات لأولادها علشان ظروف شغلها مش طول الوقت بتسمح أنها تكون متواجدة في أوقات التمرين، وعلشان كده جت لها فكرة عمل مشروع التوصيل للأطفال والسيدات من خلال سيارات، بشرط تكون الكباتن بتاعتها سيدات فقط، وده بدأته في 2020 من خلال صفحة فيسبوك، وبدأت فكرتها تنتشر بين معارفها، والفكرة نجحت جدًا لحد ما أصبح لها شكل قانوني.

ومن سنة فاتت حنان أنهت ورقها الرسمي علشان تكون معتمدة وبتشتغل بشكل قانوني في سوق النقل الإلكتروني في مصر، وأطلقت أبليكيشن Female يوم 19 مايو 2022، علشان يكون موجود رسمي على أنظمة الموبايل لطلب سيارة لتوصيل أطفال أوسيدات بأمان كامل.

وحاليًا هما شغالين في القاهرة الكبرى والإسكندرية وبيسعوا للتوسع قريب. وبحسب كلامها فالأبليكيشن مش بيقبل أي بنت للعمل إلا لما بتحصل على موافقة أمنية عليها من الجهات المختصة علشان ضمان أكبر سبل الأمان في الرحلة للسيدات.

أبليكيشن Female بيقدم خدمة التوصيل للمدارس والنادي والحضانة وغيرها، وإيجار كابتن بسيارة مستقلة، وتعليم السواقة للسيدات، والسفر للمحافظات، وطول الوقت بيحاولوا يوفروا خدمات تساعد السيدات والأطفال في الشعور بالأمان أكتر ومواجهة زحمة وضغوطات الحياة.

وتقدروا تحملوا الأبليكيشن لأنظمة أندرويد من هنا.

ولمستخدمي أنظمة IOS تقدروا تحملوا التطبيق من هنا.

وعلشان تعرفوا أكتر عنهم زوروا صفحتهم على فيسبوك من هنا.