The Definitive Guide to Living in the Capital , Cairo , Egypt

مع كل مرة بتستقبل القاهرة الجديدة فصل الشتاء، بتحصل مشاكل حقيقية بسبب الأمطار، والشوارع بتغرق بدرجة غريبة غير مفهومة لعدد كبير من سكان مدن شرق القاهرة. لكن يبدو إن المشاكل دي في طريقها للحل، بعد إعلان الحكومة المصرية عن أكبر مشروع صرف صحي لحماية القاهرة الجديدة من الغرق.. تعالوا نعرف التفاصيل.

 

مؤخرًا، وبعد عدد كبير من الاجتماعات ووضع خطط لإنهاء أزمة الصرف الصحي داخل مدينة القاهرة الجديدة، أعلن جهاز المدينة عن توصله لحل جذري لمشكلة الصرف الصحي داخل القاهرة الجديدة.

ونقل موقع اليوم السابع، عن المهندس حسام قمر، نائب رئيس جهاز مدينة القاهرة الجديدة، تفاصيل المشروع القومي للصرف الصحي داخل مدينة القاهرة الجديدة.

المشروع ده ينقسم لمرحلتين، المرحلة الأولى بتتمثل في تنفيذ خطوط انحدار، على عمق 16 متر، وربطها على الخط الرئيسي المتجه لمحطة صرف صحي الجبل الأصفر، واللي بتعد ثاني أكبر محطة صرف صحي في العالم.

وشبكات الانحدار دي بتتنفذ على أعماق بتصل لـ 16 متر، وجاري حاليًا العمل على تنفيذ عدد 4 خطوط انحدار، لخدمة ما يقرب من 75% من مدينة القاهرة الجديدة بالكامل.

ومن المقرر الانتهاء من خطوط الانحدار بشكل كامل في مارس القادم.

المشروع القومي للصرف داخل مدن شرق القاهرة، هيخدم مدن شرق القاهرة بالكامل وهي: القاهرة الجديدة والشروق ومدينة بدر، ونسبة التنفيذ وصلت لـ 95%..

المشروع بيتضمن كمان عدد من الحلول غير التقليدية للاستفادة من مياه الأمطار منها أبار الشحن الجوفي، والحدائق المستدامة اللي بتهدف لاستيعاب أكبر كمية من مياه الأمطار.

نتمنى المشروع ده يكون حل حقيقي لمشاكل سكان القاهرة الجديدة.