Omar Abd-elmaqsoud
دايمًا كنا بنسأل أي حد بياكل أو بياخد أي حاجة من غير حساب ونقوله بهزار أو تريقة “أنت فاكرها تكية ؟؟” وفي الأغلب الإجابة على السؤال ده بتبقى بالصمت أو الارتباك أو إنك ترد التريقة بتريقة، لكن في الحقيقة “منة شاهين ” كانت أول واحدة تجاوب على السؤال ده بشكل عملي، آه .. تكية.
الحكاية بدأت لما “منة ” البنت المصرية اللي اتخرجت من كلية الصيدلة، قررت إنها تلاقي حل لمشكلة بواقي الأكل اللي بيتبقى مننا سواء في بيوتنا أو في المطاعم أو في الفنادق، وإن أحسن حل واستغلال ليه هوه إننا نسد بيه جوع الفقراء، ومن هنا بدأت فكرة أبليكيشن أو تطبيق “تكية” اللي هتلاقوه موجود على Google Play أو App Store.
“منة” قالت في حوار ليها مع ” اليوم السابع” إن تطبيق “تكية” هدفه “التغلب على الجوع” وتقليل بواقي الأكل، من خلال طريقة جديدة ومبتكرة، وده هيحصل بمساعدة الجمعيات الخيرية اللي هتوصل الأكل للي مش قادرين أو مش لاقيين، علشان نتغلب على الجوع بشكل فيه تضامن اجتماعي حقيقي بين المصريين.
الإحصائيات الرسمية بتقول إن نسبة بواقي الأكل تقريبًا بتساوي 73 كيلو في السنة للفرد الواحد، وده معناه إننا بنرمي مليارات الكيلوات من الأكل سنوياً، من غير أي استفادة حقيقة منها زي ما بتقول منة لما اتكلمت عن سبب ابتكارها للأبليكيشن ده.
في مطاعم وسوبر ماركت كتير قرروا المشاركة في التطبيق، والمساهمة في القضاء على الجوع واستغلال بواقي الأكل، ده غير التعاون مع كافة مؤسسات الدولة ومؤسسات المجتمع المدني زي ما قالت “منة” عن بداية شغل الآبليكيشن والأكل هييجي منين.
أما المستفيدين من الأبليكيشن فهما الفقراء بشكل أساسي، لكن ده ما يمنعش إن هيبقى فيه عروض على الأكل بأسعار هتتناسب مع كل الناس، لكن “منة” بتتمنى إن الآبليكيشن يوصل لأكبر عدد ممكن من المصريين والعرب بهدف إننا نستفيد من بواقي أكلنا بحاجة مفيدة، أو على الأقل نحاول نقلل منها، أكتر من إننا نستغله في طلب الأكل بأسعار مخفضه.
ممكن تحمل الأبليكيشن للآندرويد من هنا.
وممكن تحمل الأبليكيشن للآيفون من هنا.
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
