The Definitive Guide to Living in the Capital , Cairo , Egypt

بالنسبة لكتير مننا الصيام بيكون مرهق، وده بيخلينا نكسل ننزل نشتري حاجة من الشارع، علشان كده ظهرت تطبيقات كتير هدفها تسهيل حياتنا في القاهرة، وأحدث التطبيقات دي هو تطبيق “جلوفو” وده متخصص أنه يساعدك تطلب اللي أنت محتاجه من أماكن كتير جدًا، وممكن كمان توصل عن طريقه حاجة لحد أنت مش قادر توصلها له، علشان كده قررنا في كايرو 360 نجرب الخدمة دي، وننقل لكم تجربتنا الكاملة عنها.

 

تطبيق “جلوفو”  بتقدر من خلاله أنك تشتري أي منتج من من المحلات اللي متعاقدين معاها، واللي بتزيد كل يوم، وكمان عندهم خدمة توصيل أي حاجة منك لأي حد، وأي مكان، وهتلاقى في التطبيق اختيارات مطاعم، ومحلات ورد وأكشاك ومخابز، وده بيتم عن طريق طيارين الإسكوتر، وكمان بيستخدموا العجل في توصيل الطلبات، بنظام التعاقد الحر مع أصحابها، بهدف الحفاظ على البيئة.

طلبنا منهم طلب حلو للتجربة من خلال اختيار المحل وبعدها المنتجات والكمية، وطلبنا، وأكدنا العنوان ورقم التليفون والمبلغ المتاح للدفع علشان لو احتجنا المندوب يجيب معاه باقي، وتم تأكيد الطلب الساعة 3:21 عصرًا، وفي خلال دقيقتين بعتوا إن الطلب اتقبل وجاري تجهيزه، ولكن بعد 37 دقيقة اتصلوا وقالوا أن المكان اللي إحنا طلبنا منه الأوردر قدامه ساعة علشان يجهزه، مع العلم إننا طالبين حاجات عادية وصغيرة، وطبعًا وافقنا على الانتظار علشان ننقل التجربة كاملة لكم.

ولازم نقلكم أن تحديد المكان في التطبيق فيه مشكلة، بياخد وقت كتير في التحميل، وكان بالنسبة لنا معاناة علشان نكتب المكان اللي إحنا موجودين فيه، على الرغم من إننا موجودين على الـGPS، وفي تطبيقات كتير بنستخدمها مجرد ما نكتب عنوانا بيظهر فورًا.

الحقيقة التجربة الأولى كانت غير جيدة، لأن الأوردر أخد وقت طويل جدًا من وقت طلبه ساعة و40 دقيقة، وده شئ محزن، وكمان لما طلبنا الأوردر كان الحساب في الأبليكيشن 84 جنيه، ولما جت الفاتورة لقيناها 88 جنيه، وكمان كابتن الدليفري اتكلم بطريقة سيئة إنه فيه 10 جنيه خدمة توصيل، ولما قلنا إن الأبليكيشن بيقول إنه مفيش، قال لأ، لما كلمنا خدمة العملاء قالت إن ماعندهاش علم بالخصم.

وبعد ما حاسبنا وخلصنا اتكلمت مسئولة خدمة العملاء تعتذر أن فعلًا فيه خصم على خدمة الدليفري، ووضحنا لها إن إحنا حاسبنا الكابتن ومشي، قالت لي “عارفة وكلمته بس هو رفض يرجع تاني”! ووقتها الحقيقة حصل لنا صدمة من كلامها.

 

إدينا فرصة تانية للخدمة، وقررنا نطلب قطعتين حلو من مكان قريب مننا، علشان نقدر نقيم النتيجة، ولكن للأسف الحال زي ما هو، نفس الأداء المحبط، بعد طلب الأوردر والموافقة عليه جات لنا “رنة”، من رقم غريب، فرجعنا اتصلنا تاني بيه بعد 3 دقائق وطلع كابتن “الشركة”، بيقولنا إنه مافيش غير قطعة واحدة من المنتج، طيب إيه البديل علشان عاوزبن حلو بعد الأكل؟، فسأل ورجع قلنا مفيش بديل، هي القطعة دي.

على العموم هنجرب “جلوفو” تاني، ونتمنى الخدمة تكون أفضل في المرات الجاية.

لتحميل التطبيق على نظام أندرويد، اضغطوا هنا

لتحميل التطبيق على نظام IOSاضغطوا هنا