The Definitive Guide to Living in the Capital , Cairo , Egypt

عاوزين تعرفوا أجمد وأحسن أماكن الخروج في القاهرة؟ سواء كانت مطاعم، أو كافيهات، أو مراكز ثقافية، أو حتى أماكن تسوق؟ ما فيش داعي تحتاروا، إحنا جمعنا لكم كل الأماكن دي من خلال جوائز اختيارات محرري كايرو 360 لأفضل الأماكن في القاهرة لعام 2021.

للسنة الثامنة على التوالي بنكمل معاكم جوائز اختيارات محرري كايرو 360، واللي بنختار فيها أجمد الأماكن في القاهرة، ورجعنا لكم السنة دي بأعداد أكبر من الجوائز فى مجالات أكثر، والهدف إننا نريحكم ونوفر عليكم مجهود البحث عن الأماكن المميزة في القاهرة اللي تستحق اهتمامكم، وفي نفس الوقت نشجع الأماكن اللي بتهتم بالعملاء وبتقدم خدمات مميزة من خلال جائزة بنبعتها لها لحد عندها نقول لها من خلالها: برافو!

من بدايتها في سنة 2010، وكايرو 360 بتشتغل بكل حماس علشان تبقى دليلكم الأول والأهم للحياة في العاصمة؛ وجوائز اختيارات المحررين بتعتبر اعتراف مننا بالجهد اللي بتبذله أماكن مختلفة في مختلف المجالات علشان تخلي حياتنا أسهل وأمتع في القاهرة.

عملية اختيار الفائزين السنة دي ما كانتش سهلة، فمن ضمن آلاف المطاعم والكافيهات وأماكن التسوق، ده غير عشرات الفنادق ومئات من المراكز الثقافية، ومراكز رياضية وتجميل، كانت مهمة فريق كايرو 360 أنهم يتفقوا على أكثر من 200 فائز في أكثر من 30 مجال مختلف.

اختياراتنا للفائزين كانت مبنية على أعلى معايير الجودة المطلوبة في أي مجال، زي جودة الخدمة أو المنتج وسعره، بالإضافة لمعايير ثانية كثيرة زي ثبات المستوى والخبرة.. كل ده طبقناه على آلاف الأماكن اللي زرناها من أول ما بدأنا ولحد النهارده.

هي صحيح مهمة صعبة وبتأخذ وقت، إلا أننا في الآخر بنوصل للأفضل اللي يستحق أن كايرو 360 ترشحه لكم علشان تروحوا الأماكن دي وأنتم مطمئنين ومتأكدين إن مستواها عالي ومميز.

تابعوا كايرو 360 يوميًا علشان تعرفوا الأماكن الفائزة السنة دي.