The Definitive Guide to Living in the Capital , Cairo , Egypt

المطبخ العالمي هو المكان اللى بيقدر يقدم بحرفية أطباق من مطابخ مختلفة وبجودة عالية. ووسط عدد كبير من المطاعم العالمية في القاهرة فريق كايرو 360 اختار لكم الأفضل.

الفائزين في فئة أفضل المطابخ العالمية فى جوائز اختيارات محرري كايرو 360 لعام 2017:

كريف – Crave

أكل مميز ومختلف، بيجبرك تحبه وتعتبره مطعمك المفضل بسبب جودة الأكل وتنوع المنيو، “كريف” مشهور كمطعم بيقدم أكلات عالمية من اللي قلبك يحبها، وله قدرة على البقاء فى قلوب وعقول أهل القاهرة بخبرته وتاريخه.

ذا سموكرى – The Smokery

لما نتكلم عن مطعم متخصص فى السلامون يبقى على طول بييجي في بالنا “ذا سموكري”، اللي أصبح علامة من علامات القاهرة، أطباقه معمولة بحرفية عالية، والمنيو مليان افكار مدهشة، لازم تجربوا “ذا سموكري”.

أوك جريل –  Oak Grill

معروفين بالستيك بتاعهم، لكنهم بيوفروا كمان تجربة أكلات تانية رائعة، لازم نرفع القبعة لـ “أوك جريل” على استخدامه دائمًا مكونات عالية الجودة.

تيدز – Ted’s

بدايته كانت في 2015، ومن وقتها وهو بيثبت نفسه، أبهر رواد مول سيتي ستارز بالمنيو بتاعته المميزة، وأكله الرائع، وجوه المبهج. ده غير ديكوراته البسيطة المريحة. “تيدز” مغامرة لازم تقوم بها لو فعلًا عاوز تجرب أكلة حلوة.

جي دبليو ستيك هاوس – JW Steakhouse

لو ميزانيتك تقدر على أسعاره، “جي دبليو ستيك هاوس” مختلف عن أى مكان ثاني، إحنا ممكن نكتب أشعار وحواديت على الستيك بتاعهم، وأنت أكيد هتبقى عاوز تعمل زينا كده لو جربته.

وان أوك – One Oak

نقدر نعتبره أكثر تجربة أكل ستيك مثيرة فى القاهرة، كل شيء محدد عندهم وأنت بتختار: نوع قطعية اللحمة، الوزن، نوع الصوص اللى عليه، ودرجة التسوية.. ده غير أن عنده بار سوشي هتقف ساعة أمامه من كثر جماله.

كولينا –Culina

أكيد وجبة البرانش عند كولينا يوم الجمعة رفعت سقف التحدي وقلبت قواعد اللعبة في مصر. الأطباق متنوعة ومختارة من بين خمسة مطابخ مختلفة، وبصراحة سهل نقول إنه البوفيه الأحسن في فئته في القاهرة، بأطباقه المعمولة باحترافية بمكونات على أعلى مستوى.

 

كازلاك – Kazlak

تجربة عمرك ما هتنساها، “كازلاك” بيقدم لك منيو متنوع بشكل مبهج، ما بين الشوربة والسلاطات والمقبلات والبيتزا وأطباق اللحوم والدجاج والمأكولات البحرية، وطبعًا الحلو اللي هتحتار كثير لحد ما هتقرر هتطلب إيه.

مو بيسترو – Mo Bistro

“مو بيسترو” هتعيش معاه ما بين الأجواء اللطيفة والخدمة الهايلة، ده غير الأكل الرائع والمنيو المميز، ببساطة المكان قدر يحقق حاجة شبه مستحيلة؛ أكلة فخمة وسط أجواء لطيفة تناسب الذوق المصري.

 

Crimson Bar & Grill

قعدة مريحة، ديكورات فخمة، منيو مليان أكلات مبهرة! ده باختصار تعريفنا لـ “كريمسون” اللي قدر يثبت نفسه في القاهرة ويبقى واحد من أهم الأماكن اللي بيروح لها كل اللي نفسه في تجربة مختلفة.

ذا إدواردز – The Edward’s

ديكورات المكان بتشمل ممتلكات كثيرة خاصة بعائلة صاحب المكان، و”ذا إدواردز” بيتميز بأجواءه اللطيفة العتيقة وده بيضفي على المطعم جو بسيط مميز كأنك قاعد في مكان تاريخي، أما الأكل فدي تجربة هايلة لازم تخوضها بنفسك.

يو بيسترو & بار – U Bistro & Bar

قعدة حلوة وأكلة أحلى، الحقيقة إننا اختارنا “يو بيسترو” لأسباب كتير، أهمها المنيو المميز اللي بيخليك محتار تختار إيه ولا إيه من مجموعة أكلات عالمية مدهشة ومعمولة بحرفية عالية.

أبيريتيفو – Aperitivo

فيه تجارب في الأكل مستحيل تنساها مهما عدى عليك من وقت، و “أبيريتيفو” فعلًا كان لازم يكون في قائمتنا لأفضل الأماكن اللي لازم تجربها في 2017، القعدة في المكان مميزة، ومنيو الأكل مبهر.

Speakeasy

مكان مميز بأكلاته المعمولة بإتقان شديد وقعدته المريحة جدًا اللي بتحسسك إنك قاعد في بيتك، ومستوى الخدمة الهايل اللي بيخليك تحس بقمة الدلع، وعلشان كده كان لازم ” Speakeas” يبقى موجود في ترشيحاتنا لكم السنة دي.