The Definitive Guide to Living in the Capital , Cairo , Egypt

لسه القاهرة قادرة تبهرنا بكل جديد، ولسه فيها أماكن كتير منا ما يعرفش عنها حاجة، ولإننا يهمنا نظهر القاهرة وجمالها، ونكون عنيكم اللي بتشوفوا بيها أجمل الأماكن والأنشطة والفعاليات فيها، قررنا في (كايرو 360) نستكشف مكان جديد، كتير مننا ماسمعش عنه قبل كده، المكان ده داخل نطاق القاهرة الجديدة (مدخل الرحاب 2- الكيلو 26 طريق القاهرة – السويس الصحراوي) واسمه “حديقة الأسرة” أو “Family Park”.

لو كنت بتدور على منطقة خضراء ومفتوحة سواء علشان تستجم وتسترخي، أو محتاج مساحة تفكر، أو تمارس بعض الأنشطة مع الأولاد أو حتى لوحدك، فحديقة الأسرة فعلًا هتكون المكان المناسب اللي بتدور عليه.. وفي السطور الجاية هنقولك ليه.

المكان عبارة عن مسطحات خضراء بمساحات ضخمة جدًا، فيها بعض المباني اللي بتقدم خدمات ترفيهية للزوار، لكن الميزة إنها مش مشوهة منظر الطبيعة الخضرة اللي حواليك، فبالتالي نقدر نقول إن المكان ترفيهي عائلي على مستوى عالمي، وكمان بيوفر فرص ممتعة للأطفال علشان يتعلموا ويستكشفوا حاجات جديدة، وضرورية لإلهامهم وتعزيز التماسك الأسري وتعزيز الشعور بالمجتمع عندهم.

الحديقة فيها إمكانيات جميلة جدًا ومناسبة لكل الأعمار، وبتوفر تجربة تعليمية جذابة للأطفال والأسرة بشكل عام، وده بيكون من خلال برامج تفاعلية ومعارض وفعاليات خاصة طول أيام الأسبوع، وفي المناسبات والأعياد كمان، ومهم نفكركم هنا إن الحديقة هتنظم حفلة كبيرة للسوبر ستار “تامر حسني” بمناسبة عيد الفطر يوم 7 يونيو الجاي.

أسعار التذاكرفي الحديقة كويسة جدًا وفي متناول الجميع، وبتكون خلال السنة دي (2019) 50 جنيه خلال أيام الأسبوع العادية، وبتختلف في أيام الجمعه والسبت والأعياد، والأطفال أقل من 4 سنوات دخولهم مجانًا، والسعر دة بيشمل ( دخول الحديقة – حديقة الحيوان والسفاري – المتحف المفتوح – ثلاث مناطق العاب ثابته اللي هي زي المراجيح كده ومناسبة لجميع الأعمار من سن 3 سنين لحد 16 سنة، وفى ألعاب للكبار كمان) وبيزيد عليهم فى الويك إند عرض النافورة الراقصة، وأوقات بيعرضوا عليها فيلم، ولو فى أيام فيها ماتشات كورة، ممكن تتفرج عليها انت وأصحابك على الشاشات العملاقة اللي بيوفرها المكان، بالإشتراك مع أكبر وأهم القنوات الرياضية العادية والمشفرة كمان، يعني من الآخر مفيش ماتش ولادوري هيفوتك.

المكان فيه متحف حربى بيضم أسلحة من حرب أكتوبر ، وحديقة حيوان كمان، يعنى مكان متكامل من كل حاجه، وبالنسبة للأطفال فوق سن الـ 4 سنوات، فبيدفع تذكرة دخول زي الفرد العادي.

بالنسبة للكبار، ففي ملاهي في الحديقة فيها ألعاب مناسبة لكل الأعمار، وليها تذاكر دخول خاصة، فمثلأ:

لعبة النهر السحري بـ 50 جنيه.

سينما 12D بـ 35 جنيه.

سينما 3D والحوت والتنين والعربيات المتصادمة، ودي حاجات بـ 20 جنيه.

البطة والسامبا بالون والحصان والمتحف والقطر بـ 15جنيه للعبة الواحدة.

وبالنسبة للأطفال ففى كمان أنشطة تعليمية زى “ديسكفرى” و”الحواس الخمسه” وبتبقى تذكرتها بـ 20 و 15 جنيه.

الحديقة كمان بتوفر ورش كتير للأطفال بداية من سن 6 سنين، ورش بتشمل تعليم جرافيك ورسم والطباعة وصناعة العطور وإعادة تدويرالمخلفات، وصناعة الخزف والعرايس والعلوم، وأشغال الموازيك، والورش دي أسعارها بتبدأ من 35 لـ 50 جنيه بحد أقصى.

مواعيد شغل الحديقة بتكون يوميًا من 9 صباحاً لـ 11 مساءً.

علشان تعرفوا أكتر عن المكان والأنشطة اللي بيقدمها وأسعارها المختلفة، ممكن تتواصلوا معاهم من خلال صفحتهم على الفيس بوك: Family Park-New Cairo