The Definitive Guide to Living in the Capital , Cairo , Egypt

انتشرت في الفترة الأخيرة على مواقع التواصل الاجتماعي، فكرة الدعم النفسي، بعد حالات الاكتئاب المختلفة اللي أصابت المصريين لأسباب كتيرة، ومؤخرًا ظهر موقع جديد اسمه “دكتور بيكا”، للعلاج النفسي للأطفال والمراهقين، وإحنا في كايرو 360 قررنا ندردش مع أصحاب الفكرة، علشان نعرف أكتر عن الخدمة وإزاي ممكن تفيد المراهقين في القاهرة.

فاطمة الزهراء محمود بتقول إن هي وزميلها أحمد مجدي أصحاب الفكرة، وإنها جات لهم عن طريق أن لهم بنات مقربات مطلقات وأرامل أو الزوج مسافر، ومسئولين عن أطفال لوحدهم مسئولية كاملة، وطبعًا مع المسؤليه الكبيرة دي دايمًا بتلاقي إن الأطفال هما العنصر المظلوم في الحكاية، وغالبًا بيصيبه بعض الاضطرابات النفسية من فقد الأب أو المشاكل الكتير اللي بتحصل داخل الأسرة.

بتكمل فاطمة وبتقول، بالإضافة للتطور التكنولوجي، وترك الأطفال من سن صغير يستخدموا الحاسبات والموبايل ويدخلوا الإنترنت من غير رقابة أو توجيه، خصوصًا المراهقين اللي دايمًا كل همهم هو تجربة كل حاجة جديدة بدون وعي، وفضولهم ده أدي إلي وجود اضطرابات نفسية وسلوكية للبعض، وإدمان مخدرات أو سلوكيات جنسية للبعض الآخر، بدافع الفضول اللي بيأدي في النهاية إلى مشاكل كتير وبيكون أسهل حل عندهم هو الانتحار.

وتابعت فاطمة، إن كمان عدم وجود وعي بالثقافة النفسية واعتبارها وصمة مجتمعية بيخوف الناس من زيارة طبيب نفسي متخصص في عيادته، وكتير بيعتبر أن الطبيب النفسي خدمة ترفيهية خاصة أن أسعار الأخصائيين أو الأطباء غالية جدًا، وكمان مفيش عيادات ومراكز نفسية متخصصة في المحافظات والأقاليم، وكل المشاكل دي خلتهم يفكروا ويطلقوا بكرة موقع “د.بيكا” وهو اختصار لجملة “behavioral and care psychologists for everyone”.

أما عن الموقع فوضحت فاطمة، أنه عبارة عن منصة إلكترونية لتوفير أخصائيين ودكاترة نفسيين متخصصين في علاج حالات الأطفال والمراهقين أون لاين عن طريق جلسات نفسية، أو استشارات سلوكية وتربوية سريعة، لكل أفراد الأسرة من أجل مساعدتهم من المشاكل النفسية أو الإدمان.

ونجح مؤسسي الموقع في التواصل مع مدارس وحضانات، واللي بدورهم رحبوا بالفكرة، وكمان هيتعاقدوا قريب مع مدرسة دولية لتقديم الدعم النفسي والمعنوي للطلاب من خلال ثقافة العلاج أون لاين، وكمان هيكون فيه أخصائيين متخصصين هيزوروا المدرسة كل فترة ويشتغلوا مع الأطفال لتحسين سلوكهم وتقويمهم.

والموقع بيقدم خدمة تقديم كورسات للمدرسين وأولياء الأمور أون لاين، للتوعية بالاضطرابات النفسية المختلفة وكيفية التعامل معها، وكمان عندهم مجلة نفسية توعوية علي الموقع، بيكتب فيها مجموعة من الصحفيين والأخصائيين والدكاترة النفسيين المتخصصين للعمل علي نشر الوعي النفسي لكل فئات المجتمع .

وشرحت فاطمة، أن طريقة الاستخدام التي وصفتها بالسهولة، بأنه يتم في ثلاث خطوات فقط، أن طالب الخدمة يدخل على الموقع من خلال اللينك ده.

بعدها بيتم تسجيل الإسم والبريد الالكتروني، وبعدين بيختار من القائمة الطبيب أو الأخصائي اللي ممكن يرتاح له، حسب التخصص والسعر والوقت المناسب له، للتحدث معه بسرية تامة في الموعد اللي يختاره بنفسه.

بعدها بيتم تواصل الموقع مع الطبيب والعميل للتأكيد عليهم اختيار المواعيد، وكمان قبلها يساعتين الدعم الفني في الموقع بيفكر العميل والطبيب للتواجد في الموعد المحدد.

الموقع كمان بيوفر مجلة إلكترونية مجانية، ده غير بعض الكورسات المتخصصة.

لزيارة الموقع اضغط هنا