The Definitive Guide to Living in the Capital , Cairo , Egypt

الصورة الرئيسية للفنان “حسام مناديلي”

تحت عنوان “حكاية شارع” أطلق جهاز التنسيق الحضاري بالتعاون مع محافظة القاهرة مبادرة جديدة، فكرتها الرئيسية بتعرفنا على شوارع القاهرة وتاريخها، وعلشان ماننساش والفايدة تعم، هيتم وضع لوحة تعريفية مقاس 70×50، وهتتثبت على عمود طوله 300 سم على مدخل كل شارع، وهيتكتب عليها اسم الشارع وسبب تسميته بالإسم ده، ونبذة مختصرة عن تاريخه، وغيرها من المعلومات اللي بتختلف طبقًا لتاريخ وقصة كل شارع.

المشروع هدفه زي ما قولنا تعريفنا بتاريخ شوارعنا، لإن شوارع مصر كتيرة، وفيها أسماء لشخصيات كتير ممكن الناس ماتعرفهاش، رغم أهمية دورها في المجتمع المصري، كمان مهمة المشروع المحافظة على ذاكرة مصر، ورصد الحكايات والجوانب الممتعة والنادرة لكل شارع من الشوارع اللي بقت حاليًا جزء لا يتجزأ من حضارة مصر.

البداية كانت مبادرة لتركيب لافتات على الشوارع اللي بتحمل أسماء شخصيات مهمة زي “محمد محمود” رئيس وزراء مصر الأسبق، ويافطة تانية لرائد الاقتصاد والصناعة المعاصرة ومؤسس أول بنك مصري “طلعت حرب”، ده غير يافطة للعالم الفلكي المصري “محمود الفلكي”.

كمان فيه شارع “محمود بسيوني” في وسط البلد، واللي هتلاقوا يافطة موجودة على أول شارع بيحمل اسمه، وهو سياسي ورجل قانون كبير، وكمان شارع “محمد صبري أبو علم” رجل القانون والسياسى المصرى المعروف، ويافطة تانيه لشارع بيحمل اسم الرئيس “عبد السلام عارف” رئيس الجمهورية العراقية الأسبق، ويافطة على أول شارع “هدى شعراوي” رائدة الحركة النسائية في مصر.

مش بس كده، لأ دي محافظة القاهرة بقت تنزل حكايات وقصص عن شوارع القاهرة على هاشتاج حكاية شارع على الفيسبوك واللي بيرصد قصص وحكايات لشوارع القاهرة الفاطمية، ممكن تتابعوه.