The Definitive Guide to Living in the Capital , Cairo , Egypt

الخروجات في الصيف بتكون صعبة شوية بسبب الحرارة العالية، وخاصة الأيام الساخنة دي، ولكن بالتأكيد مش هنحبس نفسنا وهنحتاج نشم هواء ولو كان بسيط، وأفضل مكان نستمتع فيه بده هو النيل، اللي مجرد المرور من جنبه بيدي انتعاش لجسمنا وروحنا، وفيه حدائق مميزة في القاهرة نقدر نخرج فيها من غير تكاليف عالية وكلها على النيل علشان نجمع ما بين الماء، والهواء مع بعض وهنقولكم على 5 منهم.

حديقة أم كلثوم

من الحدائق المميزة واللي هتلاقوا فيها ممشى وكراسي وتماثيل نظيفة وجميلة والفيو مفتوح على النيل وسعر التذكرة 10 جنيه وفيها ملاهي للأطفال، والحديقة مفتوحة حتى 11 مساءً.

العنوان: شارع عبد العزيز آل سعود بجوار كوبري الجامعة – بجوار المسرح العائم ومسجد صلاح الدين.

حديقة النيل

من اسمها هي على النيل مباشرة وفي أجمل بقعة من نيل القاهرة من وجهة نظرنا “المعادي” وهي أقرب لطرة وفيها فيو كامل مفتوح على النيل هتلاقوا الهوا هناك مختلف عن أي مكان، وسعر تذكرة الدخول 10 جنيهات، والحديقة مفتوحة يوميًا حتى 12 مساءً.

العنوان: كورنيش المعادي – طرة البلد.

الأندلس

بيطلق عليها “الفردوس الأسباني” نظرًا لجمال تخطيطها وديكوراتها وهي من الحدائق اللي تم تسجيلها كتراث بسبب أن فيها أشجار تخطت الـ100 سنة، ومن جوا متقسمة لأكتر من فرع وهتستمتعوا بيها جدًا خاصة انها تعتبر على نيل الزمالك ومجاورة لدار الأوبرا، وسعر التذكرة 10 جنيه ومفتوحة يوميًا حتى 10 مساءً.

العنوان: شارع الجزيرة – بجوار كوبري قصر النيل وأمام دار الأوبرا – الزمالك.

الفنون

منظر النيل هناك مبهر، وهي مناسبة لحالة روقان تام وفسحة مميزة هتقدروا تحسوا بنسمة هواء مختلطة ما بين النيل والشجر هتعمل مزيج جميل لروحكم، وهي مفتوحة يوميًا حتى الساعة 12 مساءً، وسعر التذكرة 10 جنيه.

العنوان: شارع عبد العزيز آل سعود – بجوار نادي ضباط القاهرة – المنيل.

جزيرة المعادي

حديقة المعادي أو الجزيرة كما يطلق عليها من أجمل الأماكن اللي هترد الروح في عز الصيف لأنها على النيل مباشرة وتقدروا تستمعوا بنسمات الهواء الجميلة والخدمات اللي مليانة فيها وهي تابعة للقوات المسلحة، وسعر التذكرة 35 جنيه في الأيام العادية و50 جنيه في الويك اند، وبتبقى مفتوحة حتى 12 مساءً.

العنوان: كورنيش المعادي – بعد كوبري السلام.