The Definitive Guide to Living in the Capital , Cairo , Egypt

على اعتبار إن المترو بقى وسيلة موصلات أساسية ويومية ومفيش غنى عنها تقريبًا لقطاع عريض من الناس، فبالتالي زيها زي أي وسيلة مواصلات عليها ضغط، بيحصل فيها بعض الأخطاء اللي نقدر نقول عليها “غير مقصودة” بيعملها الركاب، وده طبعًا بيتسبب في غرامات ومحاضر.

 

علشان كده هنقول لكم في “كايرو 360” على أهم 5 مخالفات بتحصل في المترو، ولازم تخلوا بالكم منها:

1- فيه عربيات في القطارات مخصصة للنساء بشكل دائم، وفي عربيات تانية محددة بأوقات معينة للسيدات برده، في حالة ركوب الرجالة للعربية دي في غير الأوقات المحددة للسيدات، أو في العربية المخصصة للسيدات طول الوقت، الغرامة بتكون 30 جنيه.

2- رمي المخلفات سواء كانت مناديل أو ورق أو قشر لب جوه المحطات والقطارات، بيعرضك لغرامة قيمتها 30 جنيه.

3- التدخين ممنوع في المحطات  (حتى المفتوحة) والقطارات، وغرامتها 30 جنيه.

4- لو ركبتم بدون تذكرة، أو استخدمتم تذكرة قديمة، غرامتها 50 جنيه.

5- تحت أي بند، في غرامة قيمتها 300 جنيه في حالة تأخير القطار عن عمد لمدة دقيقة واحدة.

وفي النهاية أسرة “كايرو 360” بتتمنا لكم رحلة سعيدة وآمنة، ومن غير غرامات.