Cairo 360
كتب: محمد طلعت
حال الشباب غير المرتبط الأيام دي زي حال البط البلدي، اللي بيكاكي في ترعة، وقاعد يدندن ويقول “حب إيه اللي انت جاي تقول عليه، أنا سينجل ياعم ومالكش فيه”، لكن إحنا قررنا في كايرو 360 إننا نساعدك ونعرفك إن الحب مش للجنس الآخر بس، الكلام اللي بنقوله ده عيب وحرام؟؟ أصبر بس لأنك ممكن ماتكنش واخد بالك أن الفلانتين مش مرتبط بهن وقررنا نرشح لك 5 أشخاص ممكن تحبهم في مولد سيدي الحب.
أول حد ممكن تحبه في حياتك وتجيب له هدية الفلانتين هو الراجل بتاع الفول اللي جنب بيتكم، أيوة حقيقي، الراجل ده عارف طلبك وبيمشيك قبل الناس لو أنت وصلت، ودايمًا يظبط لك السلطات، ويا سلام لو معاك ضيف، بيعمل معاك أحلى واجب يا باشا ويا بيه، وأنت نوارتنا ومش منتظر منك مقابل، ولما بيقول لك خلاص الحساب عندي بيقول لها بقلب جامد، وأنت مافكرتش تهاديه أي حاجة في عيد الحب.
ثاني شخص ممكن يتحب الحقيقة، عامل القهوة اللي أنت مقيم فيها، أي قهوة في أي حته، أول ما توصل، بيقول لك “أوامرك يا باشا”، ويمسي ويصبح عليك ويجيب لك المياه، ويوصي على قهوتك أو أيًا كان مشروبك إيه، ودايمًا طالما أنت عميل دائم للقهوة، مشروبك يتنده باسمك كمثال “براد شاي في التمام لعم سعيد ابن الأصول”، وده بيكون نابع عن حب مش عن تبس الحقيقة، فهل فكرت في الراجل ده؟
شوف بقى يا سيدي، السواق اللي دماغه عالية ده رزق، أيوة، زي البنت اللي بتحبك برضه، الموضوع واحد، لكن إحنا اللي مش مهتمين، وطبعًا كلنا عارفين إن الاهتمام “مابيطلبش”، تخيل لما تكون راكب ميكروباص، وأنت صاحي من النوم، ورايح شغلك مقفل، وتركب الميكروباص تلقى السواق مش بيرغي، ومشغل أغنية من الزمن الجميل، عبد الحليم أو أم كلثوم أو أي حد بعيد عن الأغاني الشعبية والصداع بتاعها، ويفتح لك يومك مثلًا بأغنية حلوة، على حسب وداد، ولا حيرت قلبي معاك، وحتى لو شغلك منير لما النسيم بيعدي، ده رزق ويستاهل عليه بوسة، قصدي هدية يعني.
كلنا عندنا أوراق عاوزين نخلصها في المصالح الحكومية، ولو أنت وقعت مع مدام عفاف اللي في الرابع، مش هترحمك، لكن في عيد الحب، لو أنت رحت تخلص حاجة مهمة، ولاقيت مدام عفاف رايقة كده وعاوزة تخدمك بعنيها، مش هتبعتك عند الأستاذ حمودة، ولا هتقول لك تختم من عند الآنسة سناء، ولا الهري ده كله، وتخلصك ورقك كله، وأنت قاعد قدامها، طيب بذمتك ما تستاهلش وردة حمراء جميلة كده تعبر لها عن امتنانك في الفلانتين.
خامس واحد ده بقى هو الكنز، اللي بيهشك ويدلع، وقت الزنقة موجود، في اللف والدوران جاي معاك، والخناقات متصدر مابيرجعش، حتى لو هما كتير، ده حتى عملوا له أغنية بتقول “صاحبي اللي كتفي في كتفه بيخليني متطمن، عارفه هيفضل جنبى مهما لقاني بتجنن”، وده بقى حب الحب، اللي لو أنت مرتبط والمزة قالت لك يا أنا يا صاحبك، تقولها بدون تفكير، ربنا يوفقك ويوقعك في بقف يغدر بالأصحاب، لأن مافيش وجه مقارنة، وده بقى مش محتاج دبدوب بميات، ولا زجاجة برفان تركيب، ولا الكلام ده، كفاية أنك تعزمه على سندوتشين كبدة وسجق وتقول له كل سنة وأنت طيب بمناسبة الفلانتين يا صاحبي، بس إحنا مش ضامنين رد فعله وقتها الحقيقة.
مقترح
الحياة في كايرو
شارع الألفي.. باريس في قلب القاهرة
أهم مباني شارع الألفي تاريخ شارع الألفي +3
الحياة في كايرو
