The Definitive Guide to Living in the Capital , Cairo , Egypt

في رمضان بتحلى اللمة والسهر. وطبعًا القاهرة مليانة أماكن كتيرة ممكن تخروجوا فيها، وتستمتعوا بأحسن وقت مع الأصحاب والعائلة. وفي السطور اللي جاية جبنا لكم 5 أماكن مختلفة، هتعيشوا فيها أجواء رمضان بجد:

1 – الحسين

أكيد الحسين أول خروجة بتيجي في البال في رمضان. وده بفضل أجوائه الرمضانية المميزة. المنطقة كلها مليانة مزارات مختلفة. تقدروا تتمشوا في خان الخليلي، وتشتروا فوانيس وإكسسوارات كتيرة.

وفي مطاعم كتيرة علشان السحور. ده غير الكافيهات اللي هناك زي الفيشاوي، وما تنسوش زيارة بيت الهراوي، اللي بيكون فيه حفلات روعة. وطبعًا مش ناسيين الصلاة في مسجد الحسين. يعني الخروجة كاملة من مجاميعه.

2 – مسجد عمرو بن العاص

في المنطقة دي لازم تستمتع بوقتك، لأنك هتزور واحد من أحسن الأماكن في العالم مش في القاهرة بس.. وهو مجمع الأديان. في منطقة واحدة هتشوف التقاء الأديان السماوية الثلاثة. المسجد والكنيسة والمعبد اليهودي.

هتشوف الكنيسة المعلقة وحصن بابليون. وكنايس تانية زي كنيسة القديس أبي سرجة والقديس مارجرجس. وقدام كل كنيسة شخص متطوع يشرح لك تاريخ الكنيسة. وكل ده مجانًا.

كمان هتشوف المتحف القبطي، وتاخد فيه أحلى الصور. وتزور المعبد اليهودي وهيكون فيه شخص بيشرح لك تاريخه مجانًا برضه. وطبعًا لازم تختم الزيارة بمسجد عمرو بن العاص. خروجة حلوة جدًا ومش هتكلفك كتير. 

3 – السيدة زينب

ماينفعش تيجي سيرة الخروجات في رمضان أو غير رمضان، من غير ما نقول على السيدة. اللي تعتبر مجمع الأكيلة في مصر. لأن فيها مجموعة من أشهر المطاعم، اللي الناس بتجيلها مخصوص في رمضان علشان تفطر جنب آل البيت.

هناك هتلاقوا “الدهان” المشهور بالمشويات واللحوم. و”العهد الجديد”، يعني الكوارع والكرشة واللسان ولحمة الرس. و”بحة” طبعًا بتشكيلة اللحوم بتاعته، من فشة وقراقيش وطحال وكبدة.

من الآخر لو أنت بتاع أكل شعبي.. مكانك السيدة.

4 – المراكب النيلية

ممكن تجربوا جو الفطار على مركب في النيل. في مراكب وبواخر نيلية كتيرة بتعمل فطار في رمضان، وبيكون معاه برنامج زي حفلات وتخت شرقي وغيرها. وبتكون تجربة لطيفة وجديدة. تقدروا تعرفوا برنامج عدد من البواخر من هنا.

5 – مول العرب

واحد من المولات اللي بتعمل برامج خاصة لرمضان. بيكون فيه حفلات وعروض متنوعة. مش شرط طول الشهر، لكن بيكون فيه سهرات جميلة في رمضان. ده غير طبعًا مجمع المطاعم اللي فيه. هناك ممكن تروح تفطر مع أصحابك، وبعدها تستمتع بعرض النافورة الراقصة.

كل سنة وأنتم طيبين.