The Definitive Guide to Living in the Capital , Cairo , Egypt

الحياة في كايرو -
مقترح

خمس حاجات ممتعة ممكن تعملهم وأنت في وسط البلد

حاجات تعملها في وسط البلد سينما زاوية قهاوي وسط البلد قهور أفتر إيت وسط البلد
خمس حاجات ممتعة ممكن تعملهم وأنت في وسط البلد
بواسطة
Cairo 360

ومين ما بيحبش وسط البلد؟ المنطقة اللي رغم كل شيء لسه محافظة على أصالتها وأماكنها المميزة، تخيل كده القاهرة من غير وسط البلد! صعبة؟ طبعًا صعبة ده كفاية الخمس حاجات الممتعة اللي ممكن تعملهم هناك ومش هيكلفوك فلوس كتير.. إيه الخمس حاجات دول؟ انزل السطر الجاي وأنت هتعرف.

سينما زاوية وأفلامها الحلوة

فكرة أن يكون فيه سينما بتعرض أفلام مهرجانات وتجارب سينمائية مستقلة دي حاجة تستحق التحية والله، كتير بنكون عايزين نهرب بدماغنا من الأفلام الأمريكية والعربية التجارية السخيفة اللي مصممة على خلطة الأكشن أو الرقاصة أو قصة الحب المكررة المملة! سينما زاوية بتعرض لنا أفلام حلوة تم اختيارها بعناية، وبنشوف فيها كمان مجموعة تجارب سينمائية شبابية جديدة وغير كل الأفلام المعروضة في باقي السينمات. وتذكرة السينما مش غالية. وعنوانها ما يتوهش: 15 شارع عماد الدين، وسط البلد.

مولات وسط البلد البسيطة

بعكس المولات الضخمة في القاهرة اللي فيها سلاسل محلات عالمية أسعار ملابسها تصيب بالصدمة، هتلاقي في مول طلعت حرب ملابس شيك وحلوة وسعرها مناسب جدًا، المول مليان محلات وده بيديك فرصة تختار اللي يناسب ميزانيتك وذوقك، وبالقرب من مول طلعت حرب هتلاقي مول البستان اللي فيه عدد ضخم من محلات الكمبيوتر، واللي منها تقدر تشتري كمبيوتر أو لاب توب بسعر رخيص، كمان هتلاقي محلات صيانة فورية كتير جدًا.

مكتبات كتير لعشاق الكتب

ولو بتدور على كتب ومش لاقيها، أكيد أكيد هتلاقيها في مكتبات وسط البلد، الشروق ومدبولي وتنمية وليلى وعمر بوك ستور، وغيرهم كتير! آلاف العناوين لكتب حلوة هتبسطك أكيد. ده غير بياعين الكتب على الرصيف اللي عندهم الأسعار أقل كتير -رغم أننا ما بننصحش حد يتشري كتب مضروبة- علشان حقوق الملكية الفكرية.

عشاق التصوير هيستمتعوا

وسط البلد فيها مباني قديمة ومهمة كتير، ودي فرصة حلوة لعشاق التصوير الفوتوغرافي يمارسوا هوايتهم، مش بس المباني هي اللي تستحق التصوير دي التماثيل في الميادين، والنيل والمراكب ماشية فيه.

القهاوي

وطبعًا مستحيل ننسى القعدة على القهوة، ووسط البلد مليانة قهاوي حلوة وبتفكرك بالماضي، إحنا مثلًا بنعشق القعدة على قهوة أفتر إيت وناكل سندوتشات من عند دهب أجدع بنت مصرية بتعمل أكل بيتي رخيص من اللي قلبك يحبه، والعنوان سهل، شارع محمود بسيوني والشارع ده أمام المتحف المصري، وممكن تدخل له من ميدان طلعت حرب! أيوة هو الشارع اللي على ناصيته جروبي. وعندك كمان قهوة زهرة البستان اللي ورا ريش كافيه في شارع طلعت حرب.. من الآخر قعدة على القهوة يعني وسط البلد.

مقترح