The Definitive Guide to Living in the Capital , Cairo , Egypt

دليلك الكامل لأحلى السهرات الرمضانية في الويك إند
بواسطة
Cairo 360

رمضان جميل بسهراته ولياليه الطويلة المبهجة.. في الدليل ده جمعنا لكم أجمل الحفلات والسهرات الرمضانية اللي تقدروا تحضروها من النهارده الخميس ولحد ليلة السبت.. ويك إند سعيد يا أهل القاهرة.

نبدأ بالنهارده يوم الخميس، وحفل فرقة الرضوان المرعشلي الصوفية للإنشاد على مسرح الحكمة، في ساقية الصاوي بالزمالك، وسعر التذكرة 50 جنيه.

كمان فيه حفل إنشاد للفنان علي الهلباوي على مسرح قاعة الحكمة في الساقية، وسعر التذكرة 60 جنيه.

ولعشاق التراث والفلكلور هتلاقوا عرض مسرحية الليلة الكبيرة من مسرح العرائس الماريونت بمركز الهناجر في دار الأوبرا المصرية.

كمان فيه عرض حكي لسيرة أبو زيد الهلالي على مسرح حديقة المنيرة، في المركز الثقافي الفرنسي بالمنيرة، من ضمن فعاليات ليالي رمضان.

وننتقل ليوم الجمعة، وحفل الفنانة نسمة عبد العزيزعلى المسرح المكشوف بدار الأوبرا المصرية، وسعر التذكرة 75 جنيه.

كمان هتلاقوا عرض حكي عرائس ماريونت الأراجوز وزوجته في المركز الثقافي الفرنسي بالمنيرة.

برضه الفنان فخر لقمان هيقدم حفلة غنائية في الربع. وسعر التذكرة: 25 جنيه.

أما لعشاق الأفلام فنادي سينما مركز جسور هيعرض فيلم Whiplash. وبعده هيكون في حلقة نقاش عن موضوع الفيلم.

ونختم بيوم السبت، ولو عاوزين تتعلموا حاجة جديدة فيه ورشة اليوم الواحد، في درب 1718 اللي بيقدم ورشة فن الموزاييك. وسعر الورشة: 200 جنيه.

أما رووم فهتستضيف الفنانة السودانية آسيا مدني، وليلة من الفلكلور السوداني. وسعر التذكرة: 50 جنيه.

كمان فريق رترو 4 الشبابي هيقدم حفلة غنائية في باب 18. وسعر التذكرة: 70 جنيه.

برضه فيه حفل أوركسترا القاهرة السيمفوني على المسرح الكبير بدار الأوبرا المصرية.

لو عاوزين تعرفوا عن كل الأحداث اللي بننشرها كل يوم على مدار الشهر شوفوا أجندة كايرو 360 هنا.

ويك إند سعيد!

مقترح