The Definitive Guide to Living in the Capital , Cairo , Egypt

لو كنت من أصحاب العربيات في القاهرة فأكيد بتعاني من مشكلة الركنة، خصوصًا في الأماكن الحيوية زي وسط البلد على سبيل المثال واللي فيها ركنة الشارع بتبقى غير رسمية، وكمان بتقفل الطرق وبتعمل أزمة مرورية طول الوقت. لكن من حسن حظنا إن القاهرة فيها جراجات مميزة، وعلشان كده خلال السطور الجاية هنقولكم على أشهر 5 جراجات في العاصمة.

روكسي

هو أحدث جراج تم افتتاحه في القاهرة، وكمان هو أول جراج ذكي في مصر، والأكبر في الشرق الأوسط، والمرحلة الأولى منه بتشيل 900 سيارة وهيوصل بعد الانتهاء منه لـ1700 سيارة، والجراج بالكامل بيشتغل إلكتروني.

الأوبرا

من أقدم الجراجات وأشهرها في منطقة العتبة، وهو بيطل على ميدان الأوبرا وبيخدم منطقة وسط البلد والعتبة والموسكي، وهو متعدد الطوابق، وبيشيل 1370 سيارة، والجراج موجود مكان دار الأوبرا المصرية القديمة.

البستان

الجراج موجود في أشهر مول كمبيوتر في مصر، وبيخدم منطقة وسط البلد بالكامل، وبيعد من أهم وأكبر الجراجات لأنه بيتكون من 11 دور، وكمان سعته 10 آلاف سيارة.

التحرير

الجراج مبنى على مساحة 20 ألف متر وبيتكون من 4 أدوار تحت الأرض كثافتهم 1700 سيارة، وهو من الجراجات اللي افتتحت حديثًا علشان تقلل الأزمة المرورية في القاهرة، ومن وقت افتتاحه تم منع أي عربية تركن في شوارع وسط البلد.

الأزهر

مكانه في الدراسة وهو مبني على مساحة 20 ألف متر، وفيه 3 أدوار تحت الارض بيشيلوا 410 سيارة، وكمان دور سطحي بيشيل 140 سيارة، وله مدخلين ومخرجين.