The Definitive Guide to Living in the Capital , Cairo , Egypt

ونلف في دواير ودواير تلف بينا وندووووووور هنلاقي كشك ومحل ورد وميدان وندوووور. المعادي بالنسبة للناس اللي ما عاشتش فيها فترة عبارة عن دوائر مغلقة كل دائرة فيها بتحولك على اللي بعدها اللي شبهها برضه. بس بما أننا من سكان المعادي من زمان هنحاول نوفر عليكم التوهان ونقول لكم على خلاصة الأماكن الحلوة في المعادي من غير لف وتوهان.

مبدأيًا اختراع google Maps ده انقذ ناس كتير من التوهان وهنحاول نحط لكم خريطة لكل مكان.

جراند مول

لو دخلت المعادي من الكورنيش هتاخد وقت طويل شوية لحد ما توصل، لكن لو دخلت من نزلة الاتوستراد بتاعة شارع النصر أو نركو الجديدة وخدت وفضلت ماشي على طول في شمال في يمين زي على الخريطة هتلاقي نفسك قدامه.

الجراند مول من أحسن الأماكن المناسبة أنك تشتري اللبس الأساسي اللي مافهيوش تدوير على موديل حلو، وفيه مطاعم أكل سريع كترة مناسبة أنها تسد جوعك بس بعيدة عن الاحترافية شوية.

 

شارع 9

مين فينا ما يعرفش شارع 9 وشهرته المعروفة بأحسن المطاعم والكافيهات من أول محطة مترو المعادي لحد بعد مترو ثكنات المعادي. بس ناس كتير ما تعرفش أن أحسن محلات الفضة في شارع 9 واللي بيكون عندها أشكال نادرة وأسعارها مناسبة، غير محلات النضارات والبازارت. بس ما يمنعش أن فيه كافيه مميز عند أهل المعادي وهو جريكو.

 

بلاتفورم كورنيش المعادي

ده توصل له بمنتهى السهولة لأنه على الكورنيش قبل ما تدخل المعادي، وجواه كافيهات ومطاعم كتير، زي قهوة ليلى اللبناني وشكسبير & كو، ومطاعم ثانية كتيير. المميز في المكان ده أنه على النبي على طول وفيه أماكن كتيير ممكن تختار منها، غير أنك ممكن تركب التاكسي النهري هناك وتتفسح في النيل شوية.

 

نادي المعادي واليخت

إحنا اتربينا تقريبًا هناك برضه على كورنيش المعادي، وهو من أحسن الأماكن اللي ممكن تخرج فيها زمان، وكان أكله معروف بحلاوته وإتقانه، بس بمرور الوقت ما ننصحش بالغداء هناك، هيكون مكان مناسب جدًا لرؤية الغروب مع شاي وحاجة مسكرة خفيفة. وبرضه النادي بيقدم خدمة أنك تركب مركب في النيل، بس الدخول بتذاكر لغير الأعضاء.

وفيه على الكورنيش مطاعم تانية كثير مختلفة أكثر واحد ممكن ننصح بيه هو Fish Market لعشاق السمك هيستمتعوا هناك جدًا.

كورت يارد المعادي

لو دخلت المعادي من الاوتستوراد نزلة شارع النص وخدت أول يمين في أول شمال، مافيش دقيقتين وهتلاقي كورت يارد المعادي على شمالك، واللي مليان كافيهات ومطاعم كتبنا عنهم مقالات نقدية قبل كده، زي كازلك ومينس وسينبون وبرو أند شو.

شارع النصر

الشارع ده كان زمان يا جماعة مركز أعياد الميلاد والخروجات، لأن فيه ماكدونالدز وهارديز وبيتزا هت، بس بمرور السنين برغم ان المحلات دي لسه موجودة وزاد عليهم كم مطعم تاني إلا أنها نادرًا ما بتكون مصدر أهتمام لأن أغلب المحلات دي ممكن تطلبهم من البيت، بس لو عاوزين تجربوا حاجة مضمونة وطعمها يجنن ومش غالية، يبقى لازم تعدوا على المدينة المنورة، وتاخدوا رز بلبن بالآيس كريم، أوكريب نوتيلا، أو بعديها بكم خطوة سيتي درينك، اللي معروف بعصائره المميزة.

وادي دجلة

ناس كتير ما تعرفش أن فيه محمية وادي دجلة، ونادي وادي دجلة وبرغم أنهم جنب بعض إلا أنهم مختلفين تمامًا عن بعض، محمية وادي دجلة من أجمل الأماكن اللي تناسب أنك تعمل camping مع أهلك وصحابك وتشوا فراخ أو تحرقوا مارشميلو، أما النادي ففيه مطاعم كتير ممكن تعجبكم.

كارفور

كارفور مش بس بينقذنا في أوقات كتير نكون بندور فيها على لبس مناسب، أو هدية قيمة، لأ ده كمان فيه مطاعم كتير جدًا سواء في الـ food court أو جنبه زي مطعم chill’s مثلًا.