The Definitive Guide to Living in the Capital , Cairo , Egypt

لو كنتم من عشاق السماء، فأكيد بتهتموا بدرجة كبيرة بأخبار الظواهر الفلكية علشان تراقبوها وتستمتعوا بيها، خصوصًا لو هتعملوا ده من مكان جميل خارج القاهرة زي الفيوم.. وفي الموضوع ده هنعرفكم على أجمل الظواهر اللي هتحصل في سماء مصر والعالم في شهر سبتمبر 2021.. مع العلم بإن مشاهدة جميع الظواهر الفلكية مالهاش أي أضرار على صحة الإنسان أو نشاطه اليومي على الأرض باستثناء كسوف الشمس اللي بيكون النظر له بالعين المجردة فيه ضرر للعين.

جاهزين؟ يلا نبدأ..

4 سبتمبر

في الليلة دي هتحصل ظاهرة مبهرة، وهي اقتران هلال القمر مع الحشد النجمي (خلية النحل)، وتقدروا تشوفوا الاقتران ده في اتجاه الشرق الساعة 3 صباحًا ولحد شروق الشمس، ولصعوبة رؤية الحشد النجمي (خلية النحل) بالعين المجردة فهتحتاجوا لاستخدام نظارة معظمة أو تلسكوب صغير.

4 – 5 – 6 سبتمبر

في الأيام دي هنشوف اقتران كوكب الزهرة مع نجم السنبلة (سبيكا)، وتقدروا تشوفوا الاقتران ده في اتجاه الغرب بعد غروب الشمس مباشرة ولحد اختفاء المشهد الساعة 8 إلا الربع مساء تقريبًا، وده لمدة ثلاثة أيام متتالية هي 4 ، 5 ، 6 سبتمبر.

7 سبتمبر

هنشوف القمر الجديد (محاق سبتمبر)، واليوم ده هو أفضل وقت في الشهر لمراقبة الأجرام السماوية الخافتة زي المجرات والحشود النجمية والكويكبات والنجوم البعيدة.

14 سبتمبر

نبتون هيقابل الشمس، وهيكون الكوكب الأزرق البعيد نبتون في أفضل وضع له بالنسبة للأرض، وهيضاء وجهه بالكامل بواسطة الشمس، وهيكون مشرق أكثر من أي وقت تاني في السنة، وهتقدروا تشوفوه طول الليل في اليوم ده، وهو أفضل وقت لمشاهدة وتصوير نبتون، مع العلم بإنه بيكون زي نقطة زرقاء صغيرة في جميع التلسكوبات باستثناء الكبيرة منها.

14 سبتمبر

عطارد هيظهر في أكبر استطالة شرقية له، هتبلغ 26.8 درجة من الشمس، وهو أفضل وقت لمشاهدة عطارد وتصويره لأنه هيكون في أعلى نقطة له فوق الأفق الغربي في السماء بعد غروب الشمس مباشرة.

16 -17 -18 سبتمبر

اقتران القمر مع زحل والمشتري لمدة ثلاثة ليالي متتالية باتجاه الجنوب الشرقي بعد غروب الشمس مباشرة وحتى الثانية والنصف من فجر اليوم التالي.

21 سبتمبر

اكتمال القمر (بدر سبتمبر)، وهيظهر القمر بدر بالعين المجردة في الفترة من 20 إلى 22 سبتمبر.

22 سبتمبر

هنشوف ذروة الاعتدال الخريفي للسنة دي في اليوم ده، وهتكون الشمس عمودية مباشرة على خط الاستواء وهيتساوى طول الليل والنهار على الكرة الأرضية والسماء هتكون جميلة في اليوم ده.