The Definitive Guide to Living in the Capital , Cairo , Egypt

الانتعاش والفرفشة يعني أجندة كايرو 360 في الويك إند، وأجندتنا النهارده مليانة مفاجآت وحفلات. تعالوا نقولكم على أهم الأحداث والفعاليات في القاهرة الأيام الجاية:

الخميس.. ضمن فعاليات مهرجان الموسيقى العربية في دار الأوبرا المصرية ومعهد الموسيقى العربية، هنستمتع الويك إند ده مع نخبة من ألمع النجوم على رأسهم “علي الحجار” و”عاصي الحلاني” والموسيقار “عمر خيرت”. أسعار التذاكر 510 – 710 – 1010 جنيه. الحفلات بتبدأ الساعة 8 مساءً.

تقدروا كمان تستمتعوا بأحلى أغاني وألحان الفلكلور في حفلة “فرقة الطنبورة” البورسعيدية على مسرح الضمة الساعة 8 مساءً. سعر التذكرة 50 جنيه.

أما مركز “مكان” فهيستضيف الفنان “مصطفى رزق” اللي هيقدم مجموعة من أجمل أغانيه اللي بيقدم معاها موسيقى مختلفة وجديدة مش هتسمعوا زيها. سعر التذكرة 80 جنيه.

يوم الجمعة.. الساعة 6 بداية حفلة النجم “تامر عاشور” في نادي “إيزي سبورت” شيراتون. سعر التذكرة 250 و500 جنيه.

أما الساعة 2 الظهر نادي الصيد في القطامية عامل احتفالية “المولد النبوي” اللي هيقدمها فرقة المرعشلى للإنشاد الدينى. الحضور مجانًا.

ولو عاوزين تتفرجوا على مسرحية تبسطكم يبقى ممكن تحضروا عرض “تشارلي ومصنع الشيكولاتة” على مسرح الفلكي في الجامعة الأمريكية. سعر التذكرة 100 جنيه.

يوم السبت.. بانواما الفيلم الأوروبي هيعرض فيلم “الخائن” في سينما الزمالك بتذاكر سعرها 60 و100 جنيه وسينما زاوية بتذاكر سعرها 50 جنيه. الحفلات هتبدأ من الساعة 10 صباحًا.

ولو حابين تسمعوا إنشاد ديني يبقى نتقابل في حفلة الشيخ زين محمود في درب 1718. سعر التذكرة 107 جنيه. الحفلة هتبدأ الساعة 8 مساءً.

أما الساعة 9 فهتلاقوا حفلة جاز جديدة لفرقة رباعي نهى فكري في روم آرت سبيس جاردن سيتي مستنياكم. التذكرة سعرها 100 جنيه.

لسه أجندتنا مليانة، وأحداث القاهرة ما خلصتش، أكيد هتلاقوا كل جديد وكل مفيد في أجندتنا. وافتكروا دايمًا إننا بنتمنى لكم ويك إند سعيد. تابعوا أجندتنا من هنا.