The Definitive Guide to Living in the Capital , Cairo , Egypt

أسبوع جديد في شهر مارس مع بداية الربيع والجو الحلو، يا ريت الجو ده ماتضيعهوش بأنك تبقى قاعد في البيت، لازم تخرج وتجرب حاجات جديدة على قد ما تقدر. وده اللي بنحاول نوفره في دليل كايرو 360 الخاص بالويك إند.

نبدأ بالنهارده الخميس، وعرض مختلف في الصالون الثقافي “دار الحكمة” بنقابة الأطباء، لأنهم هيعرضوا  فيلم “Marry and Max”. والدخول مجانًا. ولمحبي الموسيقى المختلفة ماتضيعوش  الحفل الغنائي للفنانة دينا الوديدي على المسرح المكشوف بدار الأوبرا المصرية. وسعر التذكرة: 50 جنيه. كمان في علبة ألوان في الزمالك فيه حفل غنائي لفرقة “أسرار” ومشروع “فالي”. وسعر التذكرة: 60 جنيه. أما في مساحة رووم بالزمالك،  فيه حفل غنائي هتحييه فرقة “جنان”. وسعر التذكرة: 50 جنيه.

وننتقل ليوم الجمعة، وهتستضيف مساحة ييلو أمبريلا بالمعادي، حفل غنائي لفريق “Strings & Kicks “. وسعر التذكرة: 60 جنيه. كمان هتلاقوا مشروع “Gypsy Jazz” عامل حفل موسيقي في مساحة باب 18 للفنون، بمصر الجديدة. ولعشاق الفلكلور المصري قضوا سهرة مختلفة مع فرقة الإنشاد الديني “المولوية المصرية”، واللي عاملة حفل غنائي على مسرح الجمهورية. وسعر التذكرة: 50 – 75 جنيه. برضه فرقة الحضرة عاملة حفل إنشاد ديني في الربع. وسعر التذكرة: 40 جنيه.

ونختم بيوم السبت، وهتلاقوا في مركز مدار بالمعادي، حفل غنائي يحييه شادي مؤنس وأميلي. سعر التذكرة: 50 جنيه. ده غير أن في مركز الربع الثقافي، فيه حفل غنائي للفنان أحمد فوزي. سعر التذكرة: 35 جنيه. كمان في قاعة النهر بساقية الصاوي، هتلاقوا فعالية “عالم المرأة في يوم واحد”. لكل اللي  بيخص المرأة من منتجات وإكسسوارات وأنشطة. وسعر التذكرة: 40. ونختم بحفل الموسيقار عمر خيرت، واللي هيكون على مسرح الماركيه، بكايرو فستيفال سيتي مول. سعر التذكرة من 300 إلى 750 جنيه.

لو عاوزين تعرفوا أكثر عن الأحداث اللي بننشرها كل يوم على مدار الأسبوع، تابعوا أجندتنا.

ويك إند سعيد!