The Definitive Guide to Living in the Capital , Cairo , Egypt

كل ويك إند وأنتم طيبين، ويارب تكونوا دائمًا مبسوطين، وعلشان بعد أسبوع طويل من الشغل أو الجامعة لازم فرحة، وعلشان كدة هنقولكم على أهم الحفلات والخروجات في الويك إند ده، علشان تجهزوا نفسكم للأسبوع الجاي، وتعملوا أحلى ريستارت.

نبدأ بيوم الخميس.. الفنان محمد حماقي هيكون موجود في حفلة مميزة الساعة 6 في كايرو فيستيفال سيتي، وأسعار التذاكر 350، 550، 750 جنيه.

والساعة 7:30 مساءً فرقة المولوية المصرية راجعة تاني بحفلة في بيت السحيمي وسعر التذكرة 75 جنيه.

ولو كنتم بتحبوا التراث فهيكون ميعادكم الساعة 8 مساءً، مع فرقة الرانجو السوداني في مسرح الضمة، وسعر التذكرة 50 جنيه.

أما يوم الجمعة.. فتقدروا تهربوا من زحمة الشوارع الساعة 8 صباحًا، وتحضروا رحلة التجديف بنهر النيل، اللي تذكرتها هتكون بـ140 جنيه شاملة كل حاجة.

أما الساعة 5 مساءً فنادي هليوبوليس في الشروق هيفتح أبوابه علشان يستقبل جمهور الكينج محمد منير في حفلة لايف جديدة وسعر التذكرة 300 جنيه.

ولو أنتم من عشاق الروك، فالساعة 8 مساءً فيه حفلة خاصة مع Metallica Tribute & more by VYRUS في درب 1718 بتذكرة سعرها 107 جنيه.

ندخل بقى على يوم السبت.. واللي هيكون فيه عرض لمسرحية “مفتاح شهرة” الساعة 7:30 في الجامعة الأمريكية بوسط البلد بتذكرة سعرها 70 جنيه.

أما الساعة 8 على مسرح الجمهورية موعدكم مع حفل فرقة كايروتا CAIROTA النسائية، ودول عبارة عن 5 بنات بيقدموا موسيقى مميزة وأسعار التذاكر 85 و110 جنيه.

وداخل دار الأوبرا المصرية هيكون ميعادكم الساعة 8 مع حفلة أوركسترا القاهرة السيمفوني بتذاكر أسعارها 60 – 85 – 110 جنيه.

الأحداث كتير والحفلات والعروض موجودة أكتر وتقدروا تختاروا اللي يناسبكم من هنا.