The Definitive Guide to Living in the Capital , Cairo , Egypt

مافيش أجمل من أنك تقرر تكسر روتين الأسبوع وتخرج خروجة مختلفة حتى لو كانت الدنيا برد، وفي أجندة #كايرو_360 بنحاول نوفر لكم أحداث مميزة كتير علشان الويك إند بتاعكم يبقى مليان فرحة ونشاط وسعادة.

نبدأ بيوم الخميس، وهتلاقوا في رووم آرت سبيس بالزمالك، حفل موسيقي يحييه فريق “شرق west” وفريق “كود مصر”. وسعر التذكرة: 50 جنيه. أما على مسرح الضمة بعابدين، ففيه حفل غنائي لفرقة مزامير النيل. وسعر التذكرة: 30 جنيه. كمان الفنان هشام خرما بمصاحبة فرقته، عامل حفل موسيقي على مسرح الحكمة، بساقية الصاوي. وسعر التذكرة: 60 جنيه.

وننتقل ليوم الجمعة، والمفاجأة مع الفنان “Adam Miller”  في حفل غنائي في علبة ألوان بالزمالك  بعد ما قدم كثير من العروض في الولايات المتحدة،. وسعر التذكرة: 60 جنيه. أما في بلكون هليوبوليس بمصر الجديدة،  فيه عرض لفيلم “The Virgin Suicides”. وسعر التذكرة: 25 جنيه. ولعشاق أغاني التراث ففرقة الحضرة  عاملة حفل الابتهال والإنشاد الديني، في فيلا بهية بالمعادي. وسعر التذكرة: 50 جنيه.

ونختم بيوم السبت، ومساحة علبة ألوان بالزمالك،  فيها حفل غنائي هيحييه كل من حسن رمزي وخالد العجاتي. سعر التذكرة: 60 جنيه. والجديد بقى هو بداية الموسم الثالث من كشك “ذيع موهبتك” في الحسين. وهو عبارة عن كشك لاكتشاف المواهب المختلفة.

لو عاوزين تعرفوا أكثر عن الأحداث اللي بننشرها كل يوم على مدار الشهر، تابعوا أجندتنا.

ويك إند سعيد!