دليلك لويك إند سعيد: عروض أفلام وحفلات ومسرحيات وأنشطة أكتر في القاهرة
Cairo 360
خلص الأسبوع وجينا لليوم العظيم، يوم الخميس، يعني الويك إند. اللي بننسى فيه أي حاجة خاصة بالشغل، ونخرج ونفرفش ونغير الموود. يلا نعرف حفلات وخروجات الويك إند ده من أجندة كايرو 360:
نبدأ بالنهارده، الخميس:
مسرح الجريك كامبس في وسط البلد، هيستضيف مهرجان “ونس” لموسيقى الشعوب. وده بالتنسيق مع مركز المصطبة للموسيقى الشعبية. المهرجان مستمر من النهارده لحد يوم السبت. كل يوم فيه فنانين وفرق مختلفة، زي: الطنبورة – نوبانور – فرقة الجركن البدوية – الرانجو. وغيرهم كتير. الحفلة هتبدأ الساعة 9. وسعر التذكرة: 70 جنيه لليوم.
مساحة دا هاوس في الدقي، هتستضيف فرقة “كعب داير“. اللي هيقدم موسيقى الروك مع الإلكترو. الحفلة هتبدأ الساعة 7 مساء. وسعر التذكرة: 35 جنيه.
عشاق الأفلام الروائية والتسجيلية، هينبسطوا بفعاليات بانوراما الفيلم الأوروبي. الخاص بالأفلام الروائية والتسجيلية الأوروبية. العروض بتكون في: سينما زاوية – سينما الزمالك – مركز سيماتك – المركز الثقافي الفرنسي – مركز جوتة. والبرنامج مستمر لحد يوم 18 نوفمبر.
يوم الجمعة:
فريق “بارانويد آيز” هيقدم أجمل أغاني بينك فلويد في رووم آرت سبيس. الفريق مصري وبيقدم موسيقى الروك، وبيلعب كل أغاني بينك فلويد. الحفلة هتبدأ الساعة 9 مساءً. وسعر التذكرة: 50 جنيه.
أما لو بتحب جو الأدعية والأناشيد الدينية، يبقى لازم تحضر حفلة لفريق “وصلة سماع” في دا هاوس. الحفلة هتبدأ الساعة 7 مساءً. وسعر التذكرة: 40 جنيه.
الناس بقى اللي بتحب الكتابة، وخاصة الروايات. مركز الربع بيقدم ورشة كتابة الروايات. مع الكاتب أمير عاطف. وهيعرفوا منها كل حاجة عن الحبكة وخلق الخصية وتشابك الأحداث. وكل التفاصيل التانية. الورشة تكلفتها 300 جنيه.
يوم السبت:
آخر يوم في الويك إند هيكون فيه حفلة في درب 1718، بتجمع الفريق السويسري “سواس كايلي“، اللي بيقدم موسيقى التراث البريطاني. مع فريق “بهججة”، اللي بيقدم فن المونولوج بشكل معاصر. الحفلة هتبدأ الساعة 7:30 مساءً. وسعر التذكرة: 50 جنيه.
في رووم آرت سبيس، هتسمعوا موسيقى الكلاسيكال روك من “عمر كاي“. وهيكون معاه على الجيتار “هاني”. الحفلة هتبدأ الساعة 9 مساءً. وسعر التذكرة: 50 جنيه.
ولو بتحبوا المسرح، فرقة “فن محوج” هتقدم العرض المسرحي “سوف أحكي عنك“. على مسرح رومانس في وسط البلد. العرض هيبدأ الساعة 6 مساء. وسعر التذكرة: 50 جنيه.
ويك إند لذيذ.
مقترح
فن وثقافة
في الويك إند.. دليلك للسفر في رحلة بصرية مبهرة مع توت عنخ آمون
الجيزة المتحف المصري الكبير +5
معالم وسياحة
