The Definitive Guide to Living in the Capital , Cairo , Egypt

بما إن الدنيا برد، ودرجات الحرارة كل يوم بتنزل عن اليوم اللي قبله، والشتاء داخل علينا بصدره، فأكيد مش هتلاقوا حد يقولكم “نخرج” غيرنا، لإن أكيد محتاجين دفى، والدفى هييجي من الحركة، علشان كده موقع #كايرو_360 بيقول لكم بلاش تقعدوا في البيت، لكن ده طبعًا بعد ما تتابعوا نشرة الأحوال الجوية أول بأول، علشان قبل ما تنزلوا من البيت تقدروا تحددوا نوعية اللبس اللي ممكن تنفع معاكم في الجو ده، ودايمًا تكونوا محصنين نفسكم.

أما مهمتنا فهي إننا نقولكم على أهم حفلات الويك إند ده علشان تختاروا هتقاموا الشتاء فين، وبأنهي مود:

الخميس.. الساعة 6 روايح الزمن الجميل هترجع تاني على مسرح عرائس ساقية الصاوي، وهنسمع روائع الست أم كلثوم “اسأل روحك” و”دارت الأيام” منها بنفسها . سعر التذكرة 37 جنيه.

أما فرقة الطنبورة البورسعيدية فهتقدم لنا فقرات غنائية من الفلكلور المصري المميز على مسرح الضمة الساعة 8 مساءً. التذكرة سعرها 50 جنيه.

أبو زيد وأصحابه فرقة موسيقية فيها مجموعة من عشاق الفن والمزيكا، هيكونوا موجودين الساعة 8:30 مساءً، في رووم آرت سبيس. التذكرة سعرها 100 جنيه.

أما يوم الجمعة.. الساعة 9 هنكون على موعد مع عروض واستعراضات ” فرقة رضا للفنون الشعبية” على مسرح البالون في العجوزة بعد غياب طويل. أسعار التذاكر 50، 75، 100،  150.

كمان عشاق الموسيقى الشرقية، معهد الموسيقى العربية هيستضيف حفلة موسيقية للعواد “علي طنطاوي” وعازف الأوكورديون “فاروق سلامة”. التذكرة سعرها 60 جنيه.

ولأول مرة تقدروا تزوروا “قصرالبارون” بعد افتتاحه وكمان بانوراما حرب اكتوبر ومتحف القوات الجوية مع بعض في رحلة واحدة بعنوان “اكتشف بلدك“. الرحلة هتنطلق الساعة 8 صباحًا، وقيمة الاشتراك 130 جنيه للفرد.

يوم السبت.. أسياد الزار هيقدموا حلقة جديدة على مسرح الضمة الثقافي، الحلقة هتبدأ الساعة 8 مساءً، وسعر التذكرة هيكون 50 جنيه.

وكمان عندنا حفلة عشاء في “جاز لايف” مع Wave Jazz band في رووم آرت سبيس فرع التجمع الخامس. الحفلة هتبدأ 8 مساءً وحد أدنى للطلبات 100 جنيه للفرد.

أما رووم آرت سبيس فرع جاردن سيتي فعاملين حفلة مميزة ضمن احتفالات الأعياد مع فرقة VYBZ هتبقى الساعة 8:30 مساءً. سعر التذكرة 105 جنيه.